चुनावको मुखमा जेन जी आन्दोलनबारे कारबाही सिफारिससहित दुई आयोगका प्रतिवेदन आउने
भदौ २३ र २४ गते भएको जेन जी आन्दोलन तथा त्यसपछि भएका हिंसात्मक घटनाबारे छानबिन गरिरहेका राष्ट्रिय मानवाधिकार आयोग र जेन जी घटना जाँचबुझ आयोगले कारबाही सिफारिससहित आ–आफ्ना प्रतिवेदन अन्तिम चरणमा पुर्याएका छन्। दुवै प्रतिवेदन फागुनको पहिलो सातासम्म सार्वजनिक हुन सक्ने सम्बद्ध अधिकारीहरूले बताएका छन्।
मानवाधिकार आयोगले आन्दोलनका क्रममा भएका मानवाधिकार उल्लङ्घनका घटनामा केन्द्रित रहेर छानबिन गरेको जनाएको छ भने जाँचबुझ आयोगले घटनाका सम्पूर्ण पक्षको विश्लेषण गरी सरकारलाई प्रतिवेदन बुझाउने तयारी गरेको छ।
प्रतिनिधिसभा निर्वाचन नजिकिँदै गर्दा यस्ता संवेदनशील प्रतिवेदन सार्वजनिक हुनु राजनीतिक र चुनावी दृष्टिले महत्त्वपूर्ण मानिएको छ। विश्लेषकहरूले निर्वाचनको वातावरण प्रभावित नहोस् भन्ने विषयमा सरकारले विवेकपूर्ण निर्णय लिनुपर्ने सुझाव दिएका छन्।
जेन जी आन्दोलनका क्रममा देशभर ७६ जनाको ज्यान गएको थियो। दुवै आयोगले पीडित परिवार, आन्दोलनकारी, सुरक्षाकर्मी तथा तत्कालीन प्रधानमन्त्रीसहित उच्च राजनीतिक नेतृत्वसँग बयान लिएको जनाएका छन्।
