काठमाडौं, फागुन २ — आगामी फागुन २१ गते हुने प्रतिनिधिसभा सदस्य निर्वाचनका लागि ६६ जिल्लाका १४२ निर्वाचन क्षेत्रको मतपत्र छपाइ सम्पन्न भएको निर्वाचन आयोगले जनाएको छ। आजसम्म करिब १ करोड ८२ लाख ३० हजार मतपत्र छपाइ भइसकेको सहायक प्रवक्ता कुलबहादुर जिसीले जानकारी दिए।

शुक्रबारसम्म ६३ जिल्लाको मतपत्र छपाइ सकिएको थियो भने आज थप तीन जिल्लाको मतपत्र छपाइ सम्पन्न भएको आयोगले जनाएको छ। हाल ११ जिल्लाको मात्र मतपत्र छपाइ बाँकी छ, जसमा काठमाडौँ उपत्यकासम्बन्धी क्षेत्रहरू पर्दछन्। बाँकी मतपत्र छपाइ दुई दिनभित्र सम्पन्न हुने अनुमान गरिएको छ।

आयोगले छापिएका मतपत्र प्याकिङ पनि अधिकांश पूरा भइसकेको बताएको छ। हालसम्म १६ हजार ४९४ बाकस मतपत्र प्याकिङ भइसकेको छ। दिनहुँ करिब १ हजार बाकस मतपत्र प्याकिङ र ११–१५ लाख मतपत्र छपाइ भइरहेको छ।

प्रतिनिधिसभा निर्वाचनका लागि जनक शिक्षा सामग्री केन्द्र लिमिटेडले समानुपातिक र प्रत्यक्ष निर्वाचन प्रणाली अन्तर्गत मतपत्र छपाइको काम गरेको छ। पहिलो चरणमा १० लाख ९८ हजार २०० नमुना मतपत्र छपाइ विभिन्न जिल्लामा पठाइसकिएको थियो।

समानुपातिक निर्वाचन प्रणालीतर्फको मतपत्र छपाइ माघ १३ गते दुई करोड ८ लाख ३० हजार मतपत्र छपाइ सकिएको र प्याकिङ तथा ढुवानी तयारीमा राखिएको थियो। प्रत्यक्ष निर्वाचन प्रणालीतर्फको मतपत्र छपाइ माघ १६ गतेदेखि सुरु भएको हो।

यसैबीच, आज कर्णाली प्रदेशका १० जिल्लाका १२ निर्वाचन क्षेत्रमा मतपत्र ढुवानी सुरु गरिएको आयोगले जनाएको छ। उक्त जिल्लामा सल्यान, रुकुम पश्चिम, डोल्पा, मुगु, हुम्ला, कालीकोट, जुम्ला, जाजरकोट, दैलेख र सुर्खेत रहेका छन्।