अमेरिकाको मिनेसोटा राज्यको मिनियापोलिसमा बुधबार साँझ अमेरिकी अध्यागमन तथा भन्सार प्रवर्तन (आईसीई)का अधिकारीले एक जना पुरुषको खुट्टामा गोली हानेका छन् ।

शहरमा आईसीईका एक एजेन्टले ३७ वर्षीय रेनी निकोल गुडलाई गोली हानेर मारेको एक हप्ता नबित्दै यो घटना भएको हो । गुडको हत्याको विरोधमा मिनेसोटा मात्रै नभई अमेरिकाभर विरोध प्रदर्शन भइरहेको छ ।  

गृह सुरक्षा मन्त्रालयले जारी गरेको बयानअनुसार अधिकारीहरूले उत्तर मिनियापोलिसमा भेनेजुएली मूलका ती अवैध आप्रवासीलाई पक्रन खोजेका थिए । 

आफू सवार गाडी चलाएर भाग्न खोज्दा ती पुरुषले गाडीलाई छेउमा रहेको कारमा ठोके । पैदल भाग्ने क्रममा अधिकारीले समात्न खोजे । दुईबिच खिचातानी भइरहेको समयमा नजिकैको अपार्टमेन्ट भवनबाट आएका अरू दुई जनाले सङ्घीय अधिकारीमाथि आक्रमण गरे । प्रतिररक्षामा अधिकारीले गोली चलाए । यो गोली भेनेजुएली मूलका ती पुरुषको खुट्टामा लाग्यो ।

सामान्य चोटपटक लागेका ती व्यक्तिको अस्पतालमा उपचार भइरहेको बताइएको छ । घाइते अधिकारीलाई पनि अस्पताल पुर्‍याइएको छ । प्रहरीका अनुसार ती घाइतेको अवस्था गम्भीर छैन ।

अधिकारीले आत्मरक्षामा गोली चलाएको दाबी आईसीइएको छ । यस क्रममा अन्य दुई व्यक्तिलाई पनि नियन्त्रणमा लिइएको छ । हालैका हप्तामा मिनेसेटामा मात्रै आईसीईका ३ हजार अधिकारीलाई परिचालन गरिएको छ ।