१० माघ, धनकुटा — राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) शनिबार धनकुटा सदरमुकाम सवारीबाटै परिक्रमा गर्दै फर्किएका छन्। धनकुटामा पैदल हिँड्दै मतदाता र समर्थकसँग भेटघाट गर्ने तय कार्यक्रम अन्तिम समयमा स्थगित भएको हो।

रास्वपाले भीमनारायण चोकदेखि मदन चोकसम्म बालेनको पैदल यात्राको कार्यक्रम तय गरेको थियो। तर कार्यव्यस्तताका कारण कार्यक्रम स्थगित गरिएको जिल्ला पार्टी कार्यालयले जनाएको छ। भीमनारायण चोकमा बालेन गाडीबाट नओर्ली झ्यालबाटै केहीबेर कार्यकर्ता र समर्थकसँग हात मिलाउँदै अभिवादन गरेका थिए।

रास्वपा धनकुटाका अध्यक्ष बालनन्द दाहालका अनुसार दिउँसो २ बजे बजार परिक्रमा गर्ने कार्यक्रम तय भए पनि विराटनगरमा आयोजना हुने आमसभामा सहभागी हुनुपर्ने भएकाले धनकुटाको कार्यक्रम स्थगित गरिएको हो। उनले आसन्न निर्वाचनअघि बालेनको प्रमुख आतिथ्यतामा धनकुटामा आमसभा आयोजना गरिने र बालेनले पुनः आउने प्रतिबद्धता व्यक्त गरेको जानकारी दिए।

यसअघि बालेनले इलाम, ताप्लेजुङ, पाँचथर र तेह्रथुमका विभिन्न स्थानमा पुगेर समर्थकसँग भेटघाट गरेका थिए। शनिबार बिहान धनकुटा आउनुअघि उनले हिले बजारमा भने केही समय पैदल हिँड्दै मतदाता र समर्थकसँग भेट गरेका थिए।

झापा क्षेत्र नं. ५ बाट उम्मेदवारी दिएका शाह हाल आसपासका जिल्लामा चुनावी अभियान सञ्चालन गरिरहेका छन्। बालेनको धनकुटा आगमनलाई लिएर जिल्लास्तरमा केही दिनअघि देखि नै प्रचार गरिएको थियो। पाख्रिबास बजार र धनकुटा बजारमा कार्यक्रमको व्यापक प्रचार भए पनि पाख्रिबासको तय कार्यक्रमसमेत अन्तिम समयमा रद्द भएको थियो।

कार्यक्रम समय र स्वरूपबारे सामाजिक सञ्जालमार्फत पटक–पटक फरक–फरक सूचना सार्वजनिक हुँदा कार्यकर्तासमेत अन्योलमा परेका थिए। रास्वपा धनकुटा सभापति दाहालले बालेनको विशेष कामका कारण विराटनगर पुग्नैपर्ने भएकाले धनकुटाका कार्यक्रम रद्द भएको स्पष्ट पारे।

बालेन धनकुटाबाट फर्किएपछि केहीबेरअघि इटहरी पुगेका छन्।