काठमाडौं । लुम्बिनी प्रदेशको राजधानी क्षेत्रमा स्थानीयवासीले सरकारी गाडी सञ्चालनमा रोक लगाएका छन्। अमेरिकाको एमसीसी परियोजना अन्तर्गत एमसीए नेपालले धानखोला–लमही सडकखण्डलाई दुई लेनमै स्तरोन्नति गर्न लागेको विरोधमा स्थानीयले सडकलाई चार लेनमा विस्तार गर्न माग गर्दै आन्दोलन थालेका हुन्।

धानखोला–लमही चार लेन सडक निर्माण संघर्ष समितिका संयोजक प्रकाश शाहीले माग सम्बोधन नभएसम्म पुस ७ गतेदेखि यस महिनाभर लुम्बिनी प्रदेश राजधानी क्षेत्रमा सरकारी गाडी चलाउन नदिने घोषणा गरेका छन्।

शाहीको नेतृत्वमा स्थानीय युवाहरू लुम्बिनी प्रदेश राजधानी गेट तथा राप्ती गाउँपालिका–३ स्थित प्रदेश प्रशासनिक केन्द्रको मुख्य प्रवेशद्वारमा भेला भई प्रदर्शन गरिरहेका छन्।

स्थानीयका अनुसार दाङको देउखुरी क्षेत्रमा पर्ने धानखोला–लमही सडकखण्डमा एमसीसी परियोजना अन्तर्गत एमसीए नेपालले साविक ७ मिटर चौडा सडकलाई दायाँ–बायाँ २.५/२.५ मिटर मात्र थप गरी जम्मा १२ मिटर चौडाइको दुई लेन सडक निर्माण गर्न खोजेको छ। तर बढ्दो सवारी चाप र भविष्यको आवश्यकता मध्यनजर गर्दै चार लेन सडक आवश्यक भएको स्थानीयको भनाइ छ।

यसअघि राप्ती गाउँपालिका अध्यक्ष प्रकाश विष्ट स्थानीय संघर्ष समितिका प्रतिनिधिसहित काठमाडौं पुगेर भौतिक पूर्वाधार, यातायात तथा सिँचाइ मन्त्रालयको जिम्मेवारी सम्हालेका मन्त्री कुलमान घिसिङलाई ज्ञापनपत्र बुझाउँदै माग सम्बोधनका लागि पहल गरिदिन अनुरोध गरेका थिए। तर एमसीसी परियोजनाअनुसार नै काम हुने भएकाले स्थानीय मागअनुसार परिवर्तन गर्न नसकिने जवाफ मन्त्री घिसिङले दिएको बताइएको छ।

स्थानीयले माग सुनुवाइ नभए आन्दोलन थप सशक्त बनाउने चेतावनी दिएका छन्।