काठमाडौँ, १८ मंसिर – काठमाडौँको रत्नापार्क (शंखधर उद्यान) अब घाम ताप्दै निःशुल्क इन्टरनेट सेवा प्रयोग गर्न सकिने भएको छ। महानगरपालिकाको हरियाली प्रवद्र्धन आयोजनाले नेपाल टेलिकमका ६ वटा राउटर प्रयोग गरी ५०० एमविपिएस क्षमताको वाइफाइ जडान गर्दैछ। शंखधर उद्यान तथा रानीपोखरी एकाइका टेक्निसियन सुरेशकुमार श्रेष्ठका अनुसार मंसिरभित्रै पार्कभित्र सर्वत्र इन्टरनेट सेवा उपलब्ध हुनेछ।

रत्नापार्कलाई आर्थिक वर्ष २०७२/७३ मा करिब रु ८० लाख खर्च गरी पुनःनिर्माण र व्यवस्थित गरेपछि अब यहाँ वृद्धवृद्धा, युवायुवती, विद्यार्थी र पर्यटकहरू घाम ताप्ने, रमाउने र फोटो खिच्ने गर्छन्। प्रवेश शुल्क भने विद्यार्थी रु २०, सर्वसाधारण रु ३० र विदेशी पर्यटक रु १०० निर्धारण गरिएको छ।

हाल दैनिक ५०० देखि एक हजार व्यक्तिहरू घुम्न आउने र शनिबार वा बिदा दिन बढी आगन्तुक हुने उद्यान प्रमुख उत्तमकुमार घलेले जानकारी दिए। पार्कभित्र बस्नका लागि सेट बक्स, कुर्सी र सार्वजनिक शौचालयको व्यवस्था छ। पार्कभित्र सालिक र युनिगार्डेन पनि रहेका छन्।

तर, पानीको अभावले बोटविरुवा संरक्षणमा चुनौती देखिएको छ। चाँडै पार्कमा पानीको फोहोरा सञ्चालन गर्ने तयारी भइरहेको छ।

निःशुल्क वाइफाइ सेवाले रत्नापार्कलाई आधुनिक र सर्वसुलभ मनोरञ्जन र डिजिटल पहुँचको स्थल बनाउने अपेक्षा गरिएको छ।