काठमाडौं, १९ मंसिर – उच्च पदस्थ व्यक्तिलाई लक्षित धम्कीपत्र सार्वजनिक भएपछि प्रहरीले अनुसन्धान तीव्र पार्दै केही व्यक्तिलाई नियन्त्रणमा लिएर सोधपुछ थालेको छ।

प्रहरीका अनुसार ‘प्रकाश पाठक’ नामका व्यक्तिसँग सम्पर्क र चिनजान रहेको देखिएका दुई व्यक्तिलाई बयानका लागि नियन्त्रणमा लिइएको हो। प्रहरी उच्च स्रोतले भन्यो, “धम्की दिने भनिएका व्यक्तिसँग कनेक्सन देखिएपछि सोधपुछका लागि ल्याइएका हुन्, अनुसन्धान जारी छ।” नियन्त्रणमा परेकाहरूको परिचय भने खुलाइएको छैन।

केही दिनअघि ‘एस्ट्रिमिस्ट ग्रुप अफ नेपाल (ईएनजी)’ नाम लेखिएको दुई पृष्ठ लामो धम्कीपत्र सार्वजनिक भएको थियो। पत्रमा अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईसहित पूर्वप्रमुख आयुक्त लोकमान सिंह कार्की, पूर्वमन्त्री, पूर्वआईजीपी, व्यवसायीसहित १० भन्दा बढी व्यक्तिलाई धम्की गरिएको थियो।

पत्र सार्वजनिक भएपछि ‘प्रकाश पाठक’ नाम बताउने व्यक्तिले भिडियो सन्देश जारी गर्दै अख्तियार प्रमुख राईलाई १० दिनभित्र राजीनामा दिन चेतावनीसमेत दिएका छन्।

उक्त गम्भीर धम्कीपछि काठमाडौं उपत्यका प्रहरी कार्यालयले मातहतका सबै इकाइलाई सुरक्षा सतर्कता अपनाउन र आवश्यक अनुसन्धान अघि बढाउन निर्देशन दिएको छ। बहालवाला अख्तियार प्रमुखलाई ज्यानसम्मको धम्की आएपछि अख्तियारले पनि यसबारे प्रहरीसँग छलफल थालेको छ।