काठमाडौं – सहिद दशरथचन्द स्वास्थ्य विज्ञान विश्वविद्यालयको उपकुलपति पदमा दुईपटक सूचनाको प्रकाशन भए पनि कुनै पनि उम्मेदवारको आवेदन पर्न सकेको छैन।

उपकुलपति पदमा नियुक्तिका लागि गठित सिफारिस समितिले पहिलो सूचना कात्तिक १६ गतेदेखि ३० गतेसम्म प्रकाशित गरेको थियो। समय थप गरी मङ्सिर ५ गतेसम्म आवेदन आमन्त्रण गरिएको भए पनि सो अवधिभर आवेदन प्राप्त हुन सकेको थिएन।

यसको प्रभावकारी अवस्थाप्रति ध्यान दिंदै शिक्षा, विज्ञान तथा प्रविधिमन्त्री महावीर पुनले आज सार्वजनिक रूपमा आह्वान गर्दै भने, “उपकुलपति पदको दुई पटक विज्ञापन भए पनि कसैको निवेदन परेन। स्वास्थ्य क्षेत्रमा प्राध्यापक वा विद्यावारिधि भई काम गरेको नेपाल आमाको इच्छुक देशभक्त सन्तानले निवेदन दिनुहोस् वा मलाई सिधै सम्पर्क गर्नुहोस्।”

सहिद दशरथचन्द स्वास्थ्य विज्ञान विश्वविद्यालय ऐन, २०८२ गत असार ४ गते संघीय संसदबाट पारित भई राष्ट्रपति रामचन्द्र पौडेलबाट प्रमाणीकरण भइसकेको छ।

विश्वविद्यालयले उपकुलपतिका लागि योग्य र अनुभवी नेतृत्वको खोजीमा रहँदै स्वास्थ्य शिक्षा र अनुसन्धानको गुणस्तर अभिवृद्धि गर्ने लक्ष्य राखेको छ।