दक्षिणी भारतीय राज्य आन्ध्र प्रदेशमा शुक्रबार यात्रु बहाक बस सडकबाट चिप्लेर खोलामा खसी दुर्घटना हुँदा कम्तीमा नौ जनाको मृत्यु भएको छ । अन्य २९ जना घाइते भएको प्रहरीले जनाएको छ । प्रहरीका अनुसार घाइते मध्ये केहीको अवस्था गम्भीर छ ।

आन्ध्र प्रदेशको राजधानी अमरावतीबाट करिब २६७ किलोमिटर उत्तरपूर्वमा रहेको अल्लुरी सीताराम राजु जिल्लाको तुलसीपाकालु गाउँ नजिकै दुर्घटना भएको जनाएको छ ।

प्रहरीका अनुसार बसमा ३५ जना यात्रु, दुई जना चालक र एक जना क्लीनर सवार थिए । दुर्घटनाको लगत्तै, मारेदुमिली र चिन्टुर प्रहरी स्टेसनका टोलीहरू घटनास्थलमा पुगेर स्थानीयहरूसँग मिलेर उद्धार कार्य सुरु गरेको जनाइएको छ ।

पीडितहरू अरकु उपत्यकाबाट यात्रा गर्ने स्थानीय पर्यटकका रूपमा पहिचान गरिएको छ भने उनीहरु भद्राचलम मन्दिरमा दर्शन गर्नको लागि हिंडिरहेका थिए । प्रहरीको प्रारम्भिक अनुसन्धान अनुसार बस जङ्गलले घेरिएको बाटोमा तीव्र गतिमा हिँड्दा सडकबाट पल्टिएर ठाडो ढलानबाट खसेर दुर्घटना भएको हो ।

बाक्लो कुहिरोका कारण बस चालकले सडकको अवस्था नबुझ्दा खोलामा झरेको हुन सक्ने एक प्रहरी अधिकारीले बताएका छन् । भारतीय प्रधानमन्त्री नरेन्द्र मोदीले दुर्घटना प्रति दुःख व्यक्त गर्दै पीडित परिवारलाई क्षतिपूर्तिको घोषणा गरेका छन् ।