काभ्रेपलान्चोक, पाँचखाल । अरनिको राजमार्गअन्तर्गत पाँचखाल नगरपालिका–४ मा बसको ठक्करबाट एक पैदलयात्रीको मृत्यु भएको छ। बिहान सडक किनारमा हिँडिरहेका ६५ वर्षीय स्थानीय दिलबहादुर श्रेष्ठलाई बा २ ख ६५७९ नम्बरको अरनिको यातायातको बसले ठक्कर दिँदा गम्भीर घाइते भएका थिए। उपचारका क्रममा दिउँसो १२ बजे धुलिखेल अस्पतालमा उनको मृत्यु भएको हो।

प्रत्यक्षदर्शीका अनुसार बस अर्को बससँग ‘कम्पिटिसन’ गर्दै तीव्र गतिमा दौडिरहेका बेला श्रेष्ठलाई एकै छिनमै १० मिटर टाढासम्म उछिट्ट्याइएको बताइएको छ। दुर्घटनापछि चालक फरार भएको र बसलाई जिल्ला प्रहरी कार्यालय ल्याइएको प्रहरीले जनाएको छ। चालकको खोजी भइरहेको छ।

मृत्युपछि पीडितका आफन्त र स्थानीयवासीले चालकलाई कारबाही र क्षतिपूर्तिको माग गर्दै अरनिको राजमार्ग अवरुद्ध गरे। नगर प्रमुख महेश खरेलले क्षतिपूर्ति प्रक्रिया अघि बढाउने र बन्द भएको राजमार्ग खुलाउन पहल भइरहेको बताएका छन्।