३ मंसिर, काठमाडौं । नेकपा एमालेका नेता–कार्यकर्ता र जेनजी युवाबीच उत्पन्न तनावका कारण दिनभर अशान्त बनेको बाराको सिमरा क्षेत्रमा बेलुकीदेखि स्थिति सामान्य बन्दै गएको छ। जिल्ला प्रशासन कार्यालय बाराले लगाएको कर्फ्यू आदेशको अवधि राति ८ बजेपछि सकिएसँगै दिनभर प्रदर्शनरत जेनजी युवाहरू फर्किएका छन्।

प्रमुख जिल्ला अधिकारी धर्मेन्द्रकुमार मिश्रका अनुसार कर्फ्यू जारी राख्ने कि नराख्ने भन्ने विषयमा प्रशासनले थप स्थिति विश्लेषण गरिरहेको छ। दिनभर सडकमा रोकिएका सवारीसाधनलाई प्रहरीले साँझ ६ बजेतिर मार्ग खुलाउँदै गन्तव्यतर्फ पठाएको प्रहरीले जनाएको छ।

एमाले कार्यकर्ता र जेनजी युवाबीच बढ्दो तनाव तथा सम्भावित जोखिमलाई मध्यनजर गर्दै प्रशासनले गण्डक नहरदेखि पथलैया सडकखण्डको दायाँ–बायाँ ५०० मिटर र सिमरा विमानस्थल वरपर ५०० मिटर क्षेत्रलाई दिउँसो १२:३० बजेदेखि राति ८ बजेसम्म कर्फ्यू लगाएको थियो। तर युवाहरूले कर्फ्यू उल्लङ्घन गर्दै सिमरा बजार क्षेत्रमा दिनभर प्रदर्शन जारी राखे।

साँझ प्रहरी र प्रदर्शनकारी प्रतिनिधिसहित भएको छलफलमा जेनजी युवाहरूले अगुवा सम्राट उपाध्यायमाथि हातपात गर्ने एमाले कार्यकर्तालाई पक्राउ गर्नुपर्ने माग राखे। प्रहरीले बिहीबार बिहान १० बजे घटनामा संलग्न ठानिएकाहरूलाई बोलाउने आश्वासन दिएपछि प्रदर्शन रोक्ने सहमति बनेको हो।

तनावको सुरु विहान सिमरा चोकमा एमाले कार्यकर्ताद्वारा जेनजी अगुवा उपाध्यायमाथि भएको हातपातबाट भएको थियो। एमालेलाई लक्षित गर्दै मंगलबार बेलुकी उपाध्यायले सामाजिक सञ्जालमार्फत् सिमरामा शान्तिपूर्ण विरोधको आह्वान गरेपछि बुधबार बिहान दुवै समूहबीच झडप चर्किएको थियो।

उपनग्रस्त अवस्थासम्म पुगेको तनावमा आक्रोशित युवाहरू विमानस्थलतर्फ पुगेपछि उनीहरूले मुख्य गेट ढाले र ढुंगा–बोतल प्रहार गर्दै नाराबाजी गरे। स्थितिलाई नियन्त्रणमा लिन प्रहरीले अश्रुग्यास प्रहार र लाठीचार्ज गरेको थियो।

दिनभर अशान्त रहे पनि वर्तमानमा सिमरा क्षेत्र क्रमेण सामान्य बन्दै गएको जिल्ला प्रशासनले जनाएको छ।