नवनियुक्त मुख्य सचिव अर्याल: सरकारको प्रमुख जिम्मेवारी चुनाव र सुशासन सुनिश्चित गर्नु
१० मंसिर, काठमाडौं — नवनियुक्त मुख्य सचिव सुमनराज अर्यालले जेनजी आन्दोलनपछि गठित वर्तमान सरकारको प्रमुख कार्यभार दुई वटा मात्रै रहेको स्पष्ट पारेका छन्।
पद बहालीपछि बुधबार विभिन्न मन्त्रालयका सचिव तथा कर्मचारीलाई सम्बोधन गर्दै अर्यालले भने, “२०८२ फागुन २१ गते प्रतिनिधि सभाको चुनाव सम्पन्न गर्नु र भ्रष्टाचारमुक्त, सुशासनमुक्त शासन व्यवस्था कायम गर्नु वर्तमान सरकारको मुख्य जिम्मेवारी हो।”
मुख्य सचिव अर्यालले प्रशासनिक यन्त्रले सरकारलाई सहयोग गर्न सबै तहमा प्रतिबद्ध र क्रियाशील हुनुपर्नेमा जोड दिँदै निजामती सेवाका कर्मचारीलाई तोकिएको जिम्मेवारी समयमै पूरा गर्न आग्रह गरे।
उनले जेनजी पुस्ताले असल र उत्तरदायी शासनको माग गर्दै देशभित्र गरिखाने वातावरण निर्माणको दबाब दिएको उल्लेख गर्दै भने, “यसलाई गम्भीरताका साथ मनन गरी तदनुसार काम गर्न आवश्यक छ। नेतृत्व तहले जनउत्तरदायी, सदाचारयुक्त र आधुनिक प्रविधिमा आधारित नतिजामुखी प्रणाली स्थापित गर्न पहलकदमी लिनुपर्छ।”
अर्यालले ‘टिम स्प्रिट’मा काम गर्नेमा विश्वास व्यक्त गर्दै सबै कर्मचारीलाई सहकार्य र जिम्मेवारी पूर्ण रूपमा पूरा गर्न प्रेरित गरे।
