हमासले गाजामा रहेको भनिएका थप दुई मृत इजरायली बन्धकहरूको शव इजरायललाई हस्तान्तरण गरेको छ। 

रेडक्रसले हमासबाट प्राप्त गरेको दुईवटा कफिन प्यालेस्टिनी इलाकामा इजरायली सेनालाई बुझाएको इजरायली सेना (आईडीएफ) ले बताएको छ। सैन्य सुरक्षामा रहेको उक्त कफिनलाई इजरायलतर्फ पठाइएको छ र अब तेल अभिभमा औपचारिक पहिचान गरिनेछ।

यदि पहिचान पुष्टि भएमा, हमासले यस महिनाको सुरुमा अमेरिकाको मध्यस्थतामा भएको युद्धविराम सम्झौताको पहिलो चरण अन्तर्गत २८ मृत बन्धकमध्ये १५ जनाको शव हस्तान्तरण गरेको हुनेछ। जीवित रहेका सबै २० बन्धकहरू सम्झौता पछि तुरुन्तै रिहा भएका थिए।

हमासले शवहरू पत्ता लगाउन गाह्रो भएको कारणले गर्दा यसअघिको हस्तान्तरणमा गल्तीले एक प्यालेस्टिनीको शव पनि दिएको बताएको थियो। इजरायली सेनाले सार्वजनिक रूपमा ‘संवेदनशीलताका साथ काम गर्न’ आग्रह गरेको छ।

सम्झौता अन्तर्गत, इजरायलले २५० प्यालेस्टिनी कैदी र १,७१८ गाजा बन्दीहरूलाई रिहा गरिसकेको छ, र प्रत्येक इजरायली बन्धकको शवका लागि १५ प्यालेस्टिनीको शव फिर्ता गरेको छ। हमासले गाजामा इजरायली बमबारीले भत्काएका भवनहरूको भग्नावशेषमुनि शवहरू फेला पार्न कठिनाइ भइरहेको बताएको छ।

अक्टोबर ७, २०२३ को आक्रमणपछि इजरायलले गाजामा सैन्य अभियान सुरु गरेको थियो। हमासले गरेको उक्त आक्रमणमा करिब १,२०० मानिस मारिएका थिए र २५१ जनालाई बन्धक बनाइएको थियो। हमास-शासित स्वास्थ्य मन्त्रालयका अनुसार त्यसबेलादेखि इजरायली आक्रमणमा गाजामा ६८,००० भन्दा बढी मानिस मारिएका छन्।