११ कात्तिक, काठमाडौं । अमेरिका र जापानले दुईवटा नयाँ महत्वपूर्ण सम्झौतामा हस्ताक्षर गरेका छन् । अमेरिकी राष्ट्रपति डोनाल्ड ट्रम्प र जापानकी प्रधानमन्त्री सनेई तकाइचीबीच भएको समझदारीलाई दुई देशबीचको सम्बन्धमा नयाँ युगको सुरुवातका रूपमा हेरिएको छ ।

पहिलो सम्झौता लामो समयदेखि सहयोगी रहेका दुवै देशबीचको रणनीतिक साझेदारीलाई अझ बलियो बनाउने उद्देश्यका साथ गरिएको हो । दोस्रो सम्झौता भने दुर्लभ खनिज (रेयर अर्थ) आपूर्तिसँग सम्बन्धित छ, जसले महत्वपूर्ण खनिजहरूको सुरक्षित र दीर्घकालीन आपूर्ति सुनिश्चित गर्ने ढाँचा प्रदान गर्नेछ ।

सम्झौता हस्ताक्षरपछि राष्ट्रपति ट्रम्पले जापानको प्रशंसा गर्दै भने, “जापान अमेरिकाको मजबुत र भरपर्दो सहयोगी हो।” उनले जापानकी पहिलो महिला प्रधानमन्त्री सनेई तकाइचीको नेतृत्वको पनि प्रशंसा गर्दै दुई देशबीचको सहकार्य अझ सशक्त हुने विश्वास व्यक्त गरे ।

यस सम्झौताले इन्डो–प्यासिफिक क्षेत्रमा आर्थिक र रणनीतिक सन्तुलनमा नयाँ ऊर्जा भर्ने अपेक्षा गरिएको छ ।