सत्तारुढ दल नेपाली कांग्रेसको पदाधिकारी बैठक बसिरहेको छ । पार्टी सभापति शेरबहादुर देउवा निवास बूढानीलकण्ठमा पदाधिकारी बैठक बसिरहेको सहमहामन्त्री महालक्ष्मी उपाध्याय ‘डिना’ले जानकारी दिइन् ।

बैठकमा प्रतिपक्षी दलहरूले भिजिट भिसा सेटिङ प्रकरणमा गृहमन्त्री रमेश लेखकको राजीनामा मागिरहेको विषयमा छलफल भइरहेको छ । विपक्षीहरूले गृहमन्त्री लेखकको राजीनामा र उच्चस्तरीय छानबिन आयोगको माग गर्दै प्रतिनिधिसभा अवरोध गर्दै आएका छन् । जेठ १३, र १४ गतेको प्रतिनिधिसभा बैठकमा अवरोध गरेका विपक्षीहरूले मंगलबार बस्न लागेको बैठक पनि अवरोध गर्ने तयारी गरिरहेका छन् । 

त्यस्तै पार्टीले दिएको समयमा महाधिवेशन गर्न नसक्ने भ्रातृ संस्थाको तदर्थ समिति के गर्ने भन्नेबारे पनि बैठकमा छलफल हुनेछ । महाधिवेशन गर्न नसक्ने चार भ्रातृसंस्था नेपाल विद्यार्थी संघ, तरुण दल, महिला संघ र दलित संघलाई खारेज गर्नुपर्ने आवाज चर्को रूपमा उठिरहेको छ ।