सभामुख देवराज घिमिरेले राष्ट्रिय स्वतन्त्र पार्टीका कार्यवाहक सभापति डोलप्रसाद अर्याल र प्रमुख सचेतक सन्तोष परियारसँग संसद् अवरोधबारे छलफल गरेका छन् । सभामुख घिमिरेले आज बिहान सरकारी निवास बालुवाटारमा अर्याल र परियारसँग छलफल गरेका हुन् ।  

भेटमा सभामुखले भने– ‘दुई सातादेखि विपक्षीको अवरोधले संसद् बन्धक भयो । बजेटबारे व्यापक छलफल गर्नुपर्ने, समृद्ध बनाउने बेला संसद् अवरुद्ध हुँदा जनतामा गलत सन्देश गएको छ । विपक्षीले उठाएका मुद्दा गम्भीर छन्, त्यही भएर दुई सातासम्म संसद्लाई सहमतिका लागि रोकेको हुँ । तर, अब रोक्ने अवस्था छैन । संसद्को नेतृत्वका हिसाबले मैले संवैधानिक सीमालाई पनि ख्याल गर्नुपर्दछ ।’ 

उनले थप भने, ‘राष्ट्रियसभाले ५ गतेभित्र प्रतिनिधिसभाबाट विनियोजन विधेयक पठाउन भनेको छ । यस्तो अवस्थामा जुनसुकै हालतमा बजेट पारित गर्नैपर्दछ । तपाईंहरूले आफ्नो आन्दोलनको स्वरूप बदलेर पनि संवैधानिक सीमा र बाध्यता बुझ्नुपर्छ । बरु सरकारसँग संवादका लागि आवश्यक सहजीकरण म गर्नेछु । गम्भीर भएर छलफल गरौँ ।’

बैठकमा अर्याल र परियारले विपक्षीले उठाएका माग गम्भीर भएको बताउँदै जनताको वास्तविक समस्या उठाइएको बताएका थिए । एक घण्टा भएको भेटमा उनीहरूले भनेका थिए, ‘हाम्रा माग र मुद्दामा सरकार गम्भीर नभएकाले संसद् अवरोध बाध्यात्मक भएको हो । अहिलेकै अवस्थामा हामी मुद्दाबाट पछाडि फर्कन सक्ने अवस्थामा छैनौँ । तथापि हामी अहिलेको निकासका लागि छलफल र संवादमा नै छौँ ।’