रवीन्द्र मिश्रलाई मिसिलसहित उपस्थित गराउन सर्वोच्चको आदेश
सर्वोच्च अदालतले राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रलाई अनुसन्धानको मिसिलसहित उपस्थित हुन आदेश दिएको छ ।
न्यायाधीश सुनिलकुमार पोखरेलको इजलासले बन्दीप्रत्यक्षीकरण रिटमा कारण देखाऊ आदेश जारी गर्दै मिश्रलाई यही शुक्रबार इजलासमा उपस्थित गराउन भनेको हो ।
मिश्र पत्नी सारिका कार्कीले गृहमन्त्रालयसहित १२ जनालाई विपक्षी बनाएर रिट दायर गरेकी थिइन् । उक्त रिटमाथि सर्वोच्चका न्यायाधीश पोखरेलको इजलासमा सुनुवाइ भएको थियो ।
गत चैत्र १५ गते काठमाडौंको तीनकुनेमा नवराज सुवेदी र दुर्गा प्रसाईंसहितका राजावादी समूहले गरेको प्रदर्शनका क्रममा पत्रकार सुरेश रजक र यातायात मजदुर सविन महर्जनले ज्यान गुमाएका थिए ।
उक्त घटनामा त्यही साँझ मिश्रलाई प्रहरीले पक्राउ गरेको थियो । प्रहरीले मिश्रमाथि राज्यद्रोह, संगठित अपराध, र आपराधिक उपद्रवको कसुरमा अनुसन्धान गरिरहेको छ ।
उनीविरुद्ध पछिल्लो पटक मंगलबारसहित आठौँ पटक म्याद लिइएको छ । उनी ४७ दिनदेखि जिल्ला प्रहरी परिसर काठमाडौंको हिरासतमा छन् ।
