पाकिस्तानमा निरंकुशतन्त्र स्थापित भएको पाकिस्तानका पूर्वप्रधानमन्त्री इमरान खानले भनेका छन् । माइक्रोब्लगिङ वेबसाइट एक्समा बिहिबार राति गरेको एउटा लामो पोष्ट गर्दै उनले यस्तो बताएका हुन् ।

पोष्टमा उनले आगामी दिनमा पार्टीको आन्दोलनको रूपरेखाबारे जानकारी दिएका छन् । ‘देशमा निरंकुशतन्त्र स्थापना भएको छ, सरकारी आतंकवादका कारण निर्दाेष र शान्तिप्रिय राजनीतिक कार्यकर्तालाई गोली हानी शहिद बनाइएको छ, हाम्रा हजारौं कार्यकर्ता बेपत्ता भएका छन् । सर्वाेच्च अदालतले अब यसलाई गम्भीरतापूर्वक लिनुपर्छ र आफ्नो संवैधानिक भूमिका निर्वाह गर्नुपर्छ ।’ पोष्टमा भनिएको छ ।

मानवअधिकार उल्लंघन भएको भन्दै  आफूहरू सर्वाेच्च अदालत, लाहोर उच्च न्यायालय र इस्लामाबाद उच्च अदालतमा पुगेको तर अदालतले कुनै कारबाही नगर्दा देश यस्तो अवस्थामा पुगेको पनि उनले बताए । शहिदहरूलाई श्रद्धाजली अर्पण गर्न डिसेम्बर १३ मा पेशावरमा भव्य सभा आयोजना गर्ने र यस भेलामा विपक्षी राजनीतिक दलहरूलाई सहभागी हुन निम्तो दिइने पनि उनले पोष्टमा लेखेका छन् ।

विचारधीन राजनीतिक कैदीको रिहाई र मे ९ र नोभेम्बर २६ मा भएका घटनाहरूको पारदर्शी छानबिनका लागि न्यायिक आयोग गठन गर्न पनि खानले माग गरेका छन् । माग पूरा नभए डिसेम्बर १४ गतेदेखि सविनय अवज्ञा आन्दोलन र बहिस्कार अभियान चलाउने घोषणा गर्ने बताइएको छ ।

नोभेम्बर २६ मा खानको रिहाईको माग गर्दै भएको प्रदर्शनका क्रममा ठूलो संख्यामा पीटीआईका कार्यकर्ता र समर्थकहरूलाई समातेर प्रहरीले कारबाही गरेको थियो । यस घटनापछि पीटीआईले आन्दोलन फिर्ता लिएको थियो ।