खाना पकाउने क्रममा तरकारी वा अचारमा हामी तेलको प्रयोग गर्छौ । तेललाई विभिन्न तवरले प्रयोग गरिन्छ । खाना पकाउने विधि अनुसार पनि हामी तेल रोज्छौँ । कुकिङ आयल खासगरी तरकारी पकाउन, तार्न, भुट्न, झान्न प्रयोग गरिन्छ । तर यो तेलले क्यान्सर पनि गराउन सक्छ भन्ने कुरा तपाईलाई थाहा छ ?

अमेरिका सरकारले गरेको एउटा अध्ययनले तरकारी पकाउन प्रयोग गरिने तेलका कारण खासगरी युवाहरूलाई क्यान्सर हुन सक्छ भनेर देखाएको हो । अनुसन्धानमा ३० देखि ८५ वर्ष उमेरका ८१ जनाको ट्युमरको नमुना हेरिएको थियो । उनीहरूको क्यान्सरग्रस्त ट्युमरमा सिड्स आयलकै कारण उच्च स्तरमा लिपिड पाइएको मानिएको थियो ।

यो अध्ययनको प्रतिवेदन मेडिकल जर्नल गटमा प्रकाशित छ । यसमा सूर्यमुखी, अङ्गुरको बिया, क्यानोला र मकै जस्ता बीजबाट निकालिने तेल अर्थात् सिड आयलको अधिक सेवन गर्दा क्यान्सरको जोखिम बढ्न सक्ने पाइएको छ 

आन्द्राको क्यान्सरबाट पीडित ८० जना बिरामीमाथि अनुसन्धान गर्दा उनीहरूमा बायोएक्टिभ लिपिडको स्तर उच्च पाइयो । बायोएक्टिभ लिपिड शरीरले सिड आयललाई टुक्र्याउँदा बन्ने स–साना चिल्ला मोलिक्युल हुन् । 

यो तेलको सेवनले शरीरमा ‘इन्फ्लेमेशन’ हुन सक्छ अर्थात् शरीर सुन्निन सक्छ । सिड आयललाई टुक्रयाउने बायोएक्टिभ लिपिडले प्राकृतिक रूपमा निको हुने शरीरको प्रक्रियामा अवरोध पुर्‍याउने र शरीरलाई ट्युमरबाट लड्न रोक्ने पाइयो । 

यसको तुलनामा ओमेगा फ्याटी एसिड प्रचुर मात्रामा पाइने एभोकाडो र अलिभबाट निकालिने तेल स्वास्थ्यकर विकल्प भएको अनुसन्धानकर्ताहरू बताउँछन् ।