प्रधानमन्त्री दाहालले भारतबाट फर्किएपछि ११ बुँदे वक्तव्य जारी गरे, पञ्चेश्वर आयोजना अघि बढ्ने दावी
काठमाडौं । प्रधानमन्त्री पुष्पकमल दाहालले भारतको २ दिने औपचारिक भ्रमण सकेर सोमबार साँझ स्वदेश फर्किनुभएको छ।
स्वदेश फर्किए लगत्तै उहाँले २ दिने भारत भ्रमणको बारेमा ११ बुँदे वक्तव्य जारी गर्नुभएको हो । प्रधानमन्त्री दाहाल भारतीय समकक्षी नरेन्द्र मोदीको सपथ ग्रहण समारोहमा सहभागी हुन आइतबार नयाँ दिल्ली जानुभएको थियो ।
दिल्लीबाट फर्किएपछि उहाँले जारी गरेको वक्तव्यमा समकक्षी मोदीसँगको भेटघाटमा अन्य कुराका अलावा नेपाल(भारत सम्बन्धलाई थप बलियो बनाउने, २ मुलुकबीच विगतमा भएका सहमति तथा सम्झौताको कार्यान्वयनको बारेमा कुरा भएको बताउनुभयो ।
उहाँले सबै द्विपक्षीय संयन्त्रहरूको बैठक सुचारु गर्ने, पञ्चेश्वर बहुउद्देश्यीय आयोजनाको कार्यान्वयन, अरुण जलविद्युत आयोजना र कृषि क्षेत्रमा सहकार्य जस्ता विषयमा गहन कुराकानी भएको बताउनुभएको हो ।
उहाँले आफूले प्रधानमन्त्री मोदीलाई नेपाल भ्रमणको निमन्त्रणा दिएको पनि बताउनुभएको छ । मोदीले उपयुक्त समयमा भ्रमण गर्ने जवाफ दिएको पनि उहाँले बताउनुभयो ।
'यस भ्रमणले नेपाल र भारतबीच आपसी सद्भाव अभिवृद्धि गर्न उल्लेखनीय भूमिका निर्वाह गरेको मैले विश्वास लिएको छु। त्यसका अतिरिक्त २ मुलुकबीच रहिआएको मैत्रीपूर्ण, सहयोगात्मक, बहुआयामिक, घनिष्ट सम्बन्धलाई आपसी समानता र लाभका आधारमा थप मजबुत तुल्याउन योगदान गरेको छ । आगामी दिनमा उच्च स्तर, विभिन्न तहमा सम्पर्क विस्तार गर्न तथा सम्बद्ध द्विपक्षीय संयन्त्रहरू समेतका माध्यमबाट आपसी हितका लागि सहयोग र सहकार्य प्रबर्द्धन गर्न मार्गदर्शन गरेको उहाँले जारी गरेको वक्तव्यमा भनिएको छ ।’