काठमाडौं । नेकपा एकीकृत समाजवादी पार्टीको केन्द्रीय कमिटी बैठक बुधबार पनि बस्ने भएको छ।

ललितपुरको बालकुमारीमा मंगलबारदेखि शुरु भएको बैठक बुधबार बिहान ११ बजे बस्ने भएको हो । मंगलबारको बैठकमा पार्टीको १०औं राष्ट्रिय महाधिवेशनमा प्रस्तुत हुने राजनीतिक प्रतिवेदन, सांगठनिक प्रतिवेदन, पार्टीको समाजवादी कार्यक्रम र विधान संशोधनका विषयमा छलफल शुरु भएको छ ।

बैठकमा पार्टी अध्यक्ष माधव कुमार नेपालले राजनीतिक प्रतिवेदन, सम्मानित नेता झलनाथ खनालले पार्टीको समाजवादी कार्यक्रम, उपाध्यक्ष बेदुराम भुसालले विधान संशोधन र महासचिव घनश्याम भुसालले सांगठनिक प्रतिवेदन प्रस्तुत गरेका थिए। प्रस्तुत प्रतिवेदनहरुमाथि केन्द्रीय सदस्यहरुलाई विभिन्न १२ समूह बनाएर छलफल भइरहेको छ ।

समूहगत छलफलबाट आएका निष्कर्षलाई टोली नेताले प्रस्तुत गरेपछि त्यसलाई अन्तिम रुप दिएर बुधबार नै बैठक सम्पन्न गर्ने तयारी गरिएको एकीकृत समाजवादीले जनाएको हो। एकीकृत समाजवादीको राष्ट्रिय महाधिवेशन आगामी असार १० देखि १६ गतेसम्म काठमाडौंमा हुने भएको छ ।