काठमाडौं । इलाम–२ को उपनिर्वाचनमा फाकफोकथुम गाउँपालिका १, २ र ३ नम्बर वडाको मत गनिसक्दा नेपाली कांग्रेसका डम्बर खड्काको अग्रता कायमै रहेको छ ।

आइतबार साँझ ५ बजेसम्मको मतपरिणाम अनुसार कांग्रेसका खड्का र नेकपा एमालेका सुहाङ नेम्बाङबीच कडा प्रतिस्पर्धा देखिएको हो ।अहिले यी २ जनाको मतान्तर ४२ मा झरेको छ । यसअघि २ वटा वडाको मत गनिसक्दा खड्काले ८३ मतको अग्रता बनाउनुभएको थियो ।

फाकफोकथुम १, २, ३ वडा जम्मा ४ हजार १ सय ८१ मत गन्दा कांग्रेसका खड्का ४२ मतले अगाडि रहनुभएको छ । यहाँ उहाँले १ हजार ६ सय ४३ मत ल्याउँदा एमालेका सुहाङले १ हजार ६ सय १ मत ल्याउनुभएको हो । तेस्रो स्थानमा मुढा लिएर उठ्नुभएका स्वतन्त्र उम्मेदवार डकेन्द्र थेगिम रहनुभएको छ।

आइतबार साँझ ५ बजेसम्मको मतपरिणाम तल उल्लेख गरिएको छ:

डम्बर खड्का (रूख) : १ हजार ६ सय ४३ मत
सुहाङ नेम्बाङ (सूर्य) : १ हजार ६ सय १ मत
डकेन्द्र थेगिम (मुढा) : ४ सय ३७ मत
मिलन लिम्बु (घण्टी) : ३ सय ५ मत