नेकपा एमालेमा झण्डै १५ वर्ष शक्तिशाली महासचिव रहेका माधवकुमार नेपाललाई एमालेमा विद्रोह गरेर नयाँ पार्टी बनाएको २ वर्षमै पार्टी जोगाउन हम्मेहम्मे परेको छ । २०७८ भदौ २ मा २० प्रतिशत सांसदको समर्थनमा एमालेबाट अलग भएका उनले आफ्नै नेतृत्वमा नेकपा एकीकृत समाजवादी गठन गरेका थिए । तर, अहिलेसम्म पार्टी विभाजनको औचित्य पुष्टि गर्न नसकेको आरोप उनीमाथि लाग्दै आएको छ ।

नेकपा एकीकृत समाजवादीलाई ‘पिँध नभएको लोटा’को संज्ञा दिँदै पुराना नेताहरू मुकुन्द न्यौपाने, केदार न्यौपाने, चुडामणि जंगली लगायत थुप्रै नेता तथा कार्यकर्ता एमालेमै फर्किसकेका छन् । नेतृत्वमा निरंकुशता हावी भएको, विधि, विधान र प्रक्रिया अनुसार नेतृत्व नचलेको, विचार, दृष्टि, सिद्धान्त, कार्यदिशा एमालेको भन्दा फरक नभएको उनीहरूको आरोप छ ।

धेरै नेता तथा कार्यकर्ता निराशामा रहेकाले नेकपा एकीकृत समाजवादीमा ठूलो पहिरो जाने एमाले संगठन विभाग प्रमुख काशीनाथ अधिकारीको दाबी छ । उनका अनुसार ७७ जिल्लाबाट ठूलो मात्रामा नेता तथा कार्यकर्ताहरू एमालेमा फर्किने क्रम रोकिएको छैन । नेकपा एकीकृत समाजवादीबाट ३० जना केन्द्रीय नेता एमालेमा फर्किएको विवरण अधिकारीले रातोपाटीलाई उपलब्ध गराएका छन् । यद्यपि, यसरी फर्किएका केही नेताको विवरण अद्यावधिक गर्न बाँकी रहेको दाबी गर्दै उनले करिब ४० जना केन्द्रीय नेता एमालेमै फर्किसकेको जिकिर गरे ।

प्रदेश र स्थानीय तहमा फर्र्किएका नेता तथा कार्यकर्ताहरूको विवरण आउन बाँकी रहेको उनको भनाइ छ । अधिकारीले अहिलेसम्म ३० जना केन्द्रीय नेता र १२ जना जिल्ला अध्यक्षहरू नेकपा एकीकृत समाजवादी परित्याग गरी एमाले फर्किएको जानकारी दिए ।