नेकपा (माओवादी केन्द्र) का उपाध्यक्ष एवं  प्रवक्ता अग्निप्रसाद सापकोटाले समृद्धिका  चार आधार बनाएर जनतामा जाने बताएका छन् । प्रवक्तामा नियुक्त भएपछि पहिलोपटक पार्टी कार्यालय पेरिसडाँडामा पत्रकारसँग भेटघाट गर्दै उनले समृद्धिको चार आधारबाट माओवादी केन्द्र अगाडि बढ्ने स्पष्ट पारेका हुन् । 

समृद्धिका चार आधार कृषि क्षेत्रको आधुनिकीकरण, उद्योग धन्दा र औद्योगीकरण, राष्ट्रिय सुरक्षा र विज्ञान र प्रविधिमा विशेष जोड दिएका छन् ।

‘नेपाल अहिले जटिल भूराजनीतिमा रहेको छ । हामीमा चुनौती र अवसर दुवै छ । यसका लागि हामीले समृद्धिका चार आधार तय गरेका छौँ’, उनले भने, ‘त्यसका लागि पहिलो आधार कृषिमा आधुनिकीकरण आवश्यक छ । दोस्रो उद्योगधन्दा र औद्योगीकरणमा जोड दिनुपर्छ । तेस्रो राष्ट्रिय सुरक्षा रहेको छ ।  चौथोमा विज्ञान र प्रविधिको सदुपयोग रहेका छन् । यी चार आधारलाई अधिकतम प्रयोग गरी अब माओवादी समृद्धिका लागि अगाडि बढ्छ ।’

उनले नेपालको भूराजनीति जटिल अवस्थामा रहेकाले कूटनैतिक तवरबाट शक्ति राष्ट्रहरूसँग सम्बन्ध विस्तार गर्नुपर्ने बताए । अहिलेको मिडिया, इन्टरनेटको जवानामा विज्ञान र प्रविधिलाई अधिकतम प्रयोग गरी जनतामा जाने माओवादीको नीति रहेको उनले जानकारी दिए । त्यसका लागि मिडियाको सहयोग र सहकार्यमा आइटी  फोरम बनाएर जाने उनले बताए । 

केन्द्रीय समिति बैठकमा अध्यक्षको राजनीति र साङ्गठनिक प्रतिवेदन सार्वजनिक नहुनुमा प्राविधिक कारण रहेको उनको जिकिर छ ।