जनता समाजवादी पार्टी नेपालबाट टिकट नपाएपछि धनुषाको गणेशमान चारनाथ नगरपालिकाका निवर्तमान नगरप्रमुख रामबाबु यादव लोकतान्त्रिक समाजवादी पार्टी नेपालमा प्रवेश गरेका छन् । आइतबार बिहान जनकपुरधाममा बसेको जसपा नेपालको बैठकमा उनको नाममा टिकटको टुङ्गो लाग्ने सम्भावना नदेखेपछि उनका कार्यकर्ताहरूले जसपाका शीर्ष नेताहरूमाथि हातपात नै गरेका थिए ।

सो घटनापछि रामबाबु यादवले जसपा नेपाल परित्याग गर्दै लोसपा नेपालमा प्रवेश गरेका हुन् । यादवलाई प्रतिनिधिसभा सदस्य उमाशङ्कर अरगरिया र धनुषा जिल्ला अध्यक्ष परमेश्वर साहलगायतले आज माला र टिका लगाएर पार्टीमा स्वागत गरेका हुन् । पार्टी प्रवेश पछि नवप्रवेशी रामबाबु यादवले जसपामा एकलौटी निर्णय हाबी भएको र पुराना नेता कार्यकर्तालाई अवमूल्यन गरिएकोले बाध्य भएर आफूले पार्टी छाडेर लोसपामा प्रवेश गरेको प्रतिक्रिया दिए । उनले भने, ‘आफ्नो लागि सिफारिस भएर आएको टिकट पार्टीका नेता दीपक कार्की र मन्त्री रेणु यादवले अरूलाई बाँडेर चलखेल गरे ।’ उनी २०७४ को स्थानीय तह निर्वाचनमा तत्कालीन संघीय समाजवादी फोरम नेपालबाट गणेशमान चारनाथ नगरपालिकाको मेयर पदमा निर्वाचित भएका थिए ।