मोतीपुरमा भएको झडपमा घाइते भएका ४ सुरक्षाकर्मीलाई थप उपचारका लागि काठमाडौं लगियो
बुटवलको मोतीपुर औद्योगिक क्षेत्रको जग्गा कब्जा गरी बसेकाहरूलाई हटाउने क्रममा प्रहरी र जग्गा गरी बसेकाबीच भएको झडपमा घाइते भएका ४ जना सुरक्षाकर्मीलाई थप उपचारको लागि काठमाडौं लगिएको छ।
आइतबार भएको उक्त झडपमा गम्भीर घाइते भएका ४ जनालाई नेपाली सेनाको हेलिकप्टरमार्फत् सशस्त्र प्रहरी अस्पताल र नेपाल प्रहरी अस्पतालमा लगिएको रुपन्देही प्रहरीले जनाएको छ।
काठमाडौं लगिएकाहरूमा नेपाल प्रहरीका जवान जयकुमार थारु र गेहराज पुन मगर तथा सशस्त्र प्रहरीका सहायक हवल्दार खुशीराम चौधरी र हवल्दार तिलक धामी छन्।
देशका विभिन्न जिल्लाबाट आई मोतीपुर औद्योगिक क्षेत्रको जग्गा कब्जा गरी बसेकालाई हटाउने क्रममा आइतबार दिनभर सुरक्षाकर्मी र उक्त समूहबीच झडप भएको थियो। जग्गा कब्जा गरी बसेकालाई प्रहरीले त्यहाँबाट निकाल्न खोजेपछि उनीहरूले प्रहरीमाथि ढुंगामुढा र पेट्रोल बम प्रहार गर्न थालेपछि प्रहरीले गोली प्रहार गरेको थियो।
आइतबार दिनभरजसो उक्त समूह र सुरक्षाकर्मीका बीचमा झडप भएपछि जिल्ला प्रशासन कार्यालय रूपन्देहीले आइतबार दिउँसो ४ बजेदेखि नै सो क्षेत्रमा कर्फ्यू जारी गरेको छ।
सुकुम्बासीको नाममा जग्गा कब्जा गर्ने र पछि महँगोमा विक्री गर्ने गिरोहले मोतीपुरमा सुकुम्बासीको लागि जग्गा खुलेको छ भन्ने हल्ला फिजाएपछि गत वैशाख महिनादेखि औद्योगिक क्षेत्रको जग्गा कब्जा गर्न आउने क्रम बढ्दै गएको थियो।