धनुषामा हत्याको आरोपमा तीन जना पक्राउ परेका छन्। 

धनुषाको गणेशमान चारनाथ नगरपालिका वडा नं. ९ बरमझियामा गत कात्तिक ३० गते दुई पक्षबीच कुटाकुट हुँदा वडा नम्बर २ का सरोज साहको मृत्यु भएको थियो।  सोही घटनामा संलग्न भएको आरोपमा तीन जनालाई पक्राउ गरिएको इलाका प्रहरी कार्यालय ढल्केवरका प्रमुख प्रहरी निरीक्षक तिर्थ कार्कीले जानकारी दिए।  पक्राउ पर्नेहरूमा स्थानीय पवन शर्मा, श्रवण शर्मा र प्रमोद महरा रहेको ईलाका प्रहरी कार्यालय ढल्केवरले जनाएको छ । 

बरमझियाको एक पसलमा बसिरहेको समयमा भएको विवाद कुटपिटमा परिणत भएको थियो। कुटपिट घटनामा गम्भीर घाइते भएका सरोजको उपचारको क्रममा विराटनगरस्थित एक अस्पतालमा मृत्यु भएको प्रहरी निरीक्षक कार्कीले बताए।

तीनै जनालाई नियन्त्रणमा राखी थप अनुसन्धान थालेको प्रहरीले जनाएको छ।