रूसको तल्लो सदनले पुटिन र उनका परिवारमाथि आजीवन कुनै मुद्दा नचल्ने विधेयक पास गर्यो
रूसको तल्लो सदन डुमाले त्यहाँका राष्ट्रपति भ्लादिमिर पुटिन तथा उनको परिवारविरूद्ध उनी राष्ट्रपति नरहेका बखत पनि कुनै आपराधिक मुद्दा चलाउन नसकिने एक विधेयक पारित गरेको छ ।
यो विधेयक गत जुलाईमा भएको एक जनमतसंग्रहको हिस्सा हो। रूसको दुबै सदनमा पुटिन समर्थकहरूको बहुमत छ।
राष्ट्रपतिका रूपमा पुटिनको कार्यकाल सन् २०२४ मा पूरा हुने भए पनि यसै वर्ष गरिएको संशोधनले उनलाई सन् २०२४ पछि पनि थप दुई कार्यकाल राष्ट्रपति बन्न पाउने बाटो खुला गरिदिएको छ। हालै पास भएको विधेयकले पुटिनको राजनीतिक भविष्यको चर्चा पुनः सुरू भएको छ। सन् २०० देखि पुटिन रूसी सत्ताको शीर्ष स्थानमा रहँदै आएका छन्। यस समयमा उनले आफूलाई प्राप्त शक्तिको भरपुर उपयोग गरेका छन्।
विधेयक पास भएपछि पुटिनका आलोचक एलेक्सी नवेलनीले 'पुटिनलाई अहिले नै बचाव विधेयकको के आवश्यकता छ?' भनेर ट्विटमा प्रश्न गरेका छन्। यस्तै उनले अर्को ट्विटमा 'तानाशाह जब चाहन्छन् तब पद छोड्न सक्छन् हो?', भनेका छन्।
सदनमा पुटिन समर्थक पार्टी युनाइटेड रसिया पार्टीको बहुमत छ। सदनका ३७ वामपन्थी सासंदले भने विधयेकको विपक्षमा मतदान गरेका थिए। डुमामा यो विधेयकलाई अब दुई पटक पेस गरिनेछ। त्यसपछि यसलाई रसियाको माथिल्लो सदनमा लगिनेछ। त्यसपछि विधेयकमाथि अन्तिम छाप राष्ट्रपतिका हैसियतले स्वयं पुटिनले लगाउने छन्।
डुमामा यो विधेयकलाई तीन पटक पेश गर्नुपर्छ। मंगलबार पहिलो पटक यसलाई पेस गरिएको हो।
