बलिउड भेट्रान अभिनेता ऋषि कपूरको ३० अप्रिलमा निधन भयो। उनको निधनसँगै सम्झौता गरेका कैयौ फिल्मलाई पनि अधुरै छोडेर गए। जसमा दीपिका पादुकोणसँगको फिल्म 'द इन्टर्न'को रिमेक पनि छ।

पछिल्ला रिपोर्टअनुसार ऋषि कपूरले आफ्नै छोरासँग गर्न लागेको फिल्म पनि अधुरै छोडेर गएको तथ्य बाहिर आएको छ।

ऋषि गुजराती फिल्म 'चाल जीवी लाइए' को हिन्दी रीमेकका लागि तयारी गर्दै थिए। यसमा आफ्ना छोरा रणबीर कपूरसँग काम गर्ने तयारी थियो। ऋषिको निर्मातासँग पनि कुराकानी भइसकेको थियो। रणवीर पनि प्रोजेक्टका लागि सहमत भइसकेका थिए। तर लकडाउनका कारण फिल्म अगाडि बढ्न सकेको थिएन्।

फिल्म 'चाल जीवी लाइए' को रिमेक बनाउने कम्पनीका सीईओ रितेश जालानले बलिउड हंगामासँग भनेका छन्, 'हामीहरु ऋषि कपूर र रणबीर कपूरसँग फिल्मको हिन्दी रीमेक बनाउने तयारीमा थियौं। कुराकानी पनि भइसकेको थियो। तर कोरोना महामारीका कारण काम अघि बढ्न सकेन। अचानक उहाँको मृत्युको खबरले हामी सबैलाई आहत बनायो। '

फिल्म 'चाल जीवी लाइए' मा बाबुछोराको वरीपरी घुम्ने कथा छ। जसमा छोरा काममा अत्यधिक व्यस्त हुने र पितालाई समय नदिएको हुन्छ। तर जब बाबुले आफ्नो एक अन्तिम इच्छा सुनाउँदा छोरा सबै काम छोडेर उक्त इच्छा पुरा गर्नका लागि आउँछ। ऋषि कपूर फिल्मको कथा र योजना रुचाएर काम गर्नका लागि उत्साहित थिए।