नेपाल आएका भारतीय विदेश सचिव हर्षवर्द्धन श्रींगला गोरखा र मनाङ जाने भएका छन् ।

भारतीय सहयोगमा बनेका निजी घर, विद्यालय र गुम्बा पुनर्निर्माणको उद्घाटन गर्न श्रींगला गोरखा र मनाङ जान लागेका हुन् । बिहीबार त्रिभुवन अन्तर्राष्ट्रिय विमानस्थलमा पत्रकारहरूसँग कुराकानी गर्दै श्रींगलाले शुक्रबार गोरखा र मनाङ जाने कार्यक्रम रहेको बताए ।

‘गोरखामा ५० हजार घर बनाउने प्रधानमन्त्री मोदीको प्रतिवद्धता थियो । जसअनुसार ४६ हजार घर बनिसकेको छ,’ उनले भने, ‘तीन वटा विद्यालय पुनर्निर्माण भएको छ। त्यो उद्घाटन गर्ने कार्यक्रम छ।’

भूकम्पले भत्काएका निजी घर र विद्यालय भवन भारतीय सहयोगमा निर्माण भएका थिए । यस्तै, उनी मनाङ पनि जाँदैछन् । भूकम्पले भत्काएको गुम्बा भारतीय सहयोगमा मनाङमा पुनर्निर्माण गरिएको थियो ।

उक्त गुम्बा उद्घाटनका लागि उनी मनाङ जान लागेका हुन्  ।

विदेश सचिव श्रींगला दुई दिने औपचारिक भ्रमणका लागि आज नेपाल आएका हुन् । उनले राष्ट्रपति, प्रधानमन्त्री, परराष्ट्र मन्त्री, परराष्ट्र सचिव लगायतसँग शिष्टाचार भेटवार्ता गर्ने कार्यक्रम पनि छ ।