बेग्ला बेग्लै सवारी दुर्घटनामा परि काठमाडौं उपत्यकामा दुई जनाको मृत्यु भएको छ । 

काठमाडौं महानगरपालिका– ३१ शान्तिनगरमा मोटरसाइकलले पैदल यात्रुलाई ठक्कर दिँदा एक पैदलयात्रीको मृत्यु भएको छ । मृत्यु हुनेमा गोलढुंगा बस्ने २० वर्षका सुजु पतुवार रहेको प्रहरीले जनाएको छ ।

बुधबार साँझ सडकमा पैदल यात्रा गरिरहेका पटुवारलाई मोटरसाइकलले ठक्कर दिएपछि उनी घाइते भएका थिए ।

उनलाई उपचारको क्रममा सिभिल अस्पताल पुर्याइएको र त्यहाँबाट ट्रमा सेन्टर लगिएकोमा उपचारको क्रममा मृत्यु भएको प्रहरीले जनाएको छ । दुर्घटनामा घाइते भएका मोटरसाईकल चालकको केएमसी अस्पतालमा उपचार भइरहेको प्रहरीले जनाएको  छ। 

त्यसैगरी नम्बर नखुलेको बोलेरो गाडिले ठक्कर दिँदा ललितपुर महानगरपालिका– ८ मा एक पैदल यात्रीको मृत्यु भएको छ । गाडिको ठक्करबाट इमाडोलका ७८ वर्षीय बाबुकाजी श्रेष्ठ घाइते भएको र उपचारका लागि विएण्डवी अस्पताल लैजाने क्रममा मृत्यु भएको प्रहरीले जनाएको छ ।

ठक्कर दिने सवारीसाधनको खोजी भइरहेको प्रहरीको भनाई छ ।