काठमाडौं । राष्ट्रिय मानव अधिकार आयोगले प्रदेश ५ को स्थायी राजधानी दाङको देउखुरीलाई बनाउने प्रस्तावको विरोधमा भएका प्रदर्शनलाई हिंसात्मक नबनाउन सम्बन्धित सवै पक्षलाई आग्रह गरेको छ । रुपन्देहीमा भइरहेको बन्द, हड्ताल तथा प्रदर्शनका क्रममा आन्दोलनरत पक्षबाट सरकारी सवारी साधनहरुमाथि भएको आगजनी तथा तोडफोडप्रति गम्भीर ध्यानाकर्षण भएको भन्दै आयोगले प्रदेश कार्यालय बुटवलमार्फत घटनाका सम्बन्धमा अनुगमन भइरहेको जनाएको छ । 

अनुगमनका क्रममा तिलोत्तमा नगरपालिकामा कार्यरत एक राष्ट्रसेवक कर्मचारीको सवारीसाधन तथा निजका व्यक्तिगत सरसामानहरु समेत जलाइएको आयोगले जनाएको छ।  यस्तै प्रदेशका मुख्यमन्त्री चढेकोे गाडी तथा अन्य सरकारी सवारी साधनहरुमा समेत ढुंगामुढा, तोडफोड तथा आगजनी गरिएको पाइएको भन्दै आयोगले सोमबार एक विज्ञप्तिमार्फत बन्दको कारण रुपन्देही र आसपासका जिल्लाहरुमा बिरामी, वृद्ध, गर्भवती महिला, श्रमिकलगायत आमनागरिकहरुको आवागमन तथा दैनिक जीवनमा कठिनाई उत्पन्न भएको पाइएको समेत जनाएको छ । 

‘असहमतिका कुनै पनि विषयमा शान्तिपूर्णरुपमा विरोध तथा प्रदर्शन गर्न पाउने हक प्रत्येक नागरिकलाई भए तापनि आगजनी, तोडफोड जस्ता कार्यहरु कुनै पनि दृष्टिकोणबाट उचित हुँदैनन् । अतःविरोधका कार्यक्रमरुलाई हिंसात्मक नबनाई संयमित र शान्तिपूर्ण रुपमा अगाडि बढाउन तथा आफ्ना असहमतिका विषयहरुको वार्ता र संवादको माध्यमबाटै समाधान खोज्न आयोग आन्दोलनरत पक्षलाई आग्रह गर्दछ ।’

साथै, आयोगले शान्तिपूर्ण रुपमाविरोध प्रदर्शनमा उत्रिएका नागरिकहरुमाथि मर्यादित र संयमित व्यवहार गर्न पनि स्थानीय प्रशासनको ध्यानाकर्षण गराएको छ ।