दार्चुला सदरमुकाम खलंगामा निषेधाज्ञा उल्लंघन हुन थालेपछि प्रशासनले सेना परिचालन गरेको छ ।

सदरमुकाम खलंगामा कोरोना संक्रमण बढ्दै गएपछि प्रशासनले चरणवद्ध रूपमा निषेधाज्ञा जारी गरिरहेको थियो । खलंगा बजारको एक ठाउँमा तीन सातादेखि निषेधाज्ञा छ । अर्को ठाउँमा पनि संक्रमण बढेपछि सातायता निषेधाज्ञा जारी गरिएको छ ।

प्रमुख जिल्ला अधिकारी शरदकुमार पोखरेलका अनुसार पसल खोल्ने, मानिसहरू हिँडडुल गर्ने र सामाजिक दूरीसमेत कायम नहुने भएपछि सेना परिचालन गरिएको हो । ‘निषेधाज्ञा उल्लंघन हुने क्रम बढेपछि मानिसहरूमा मनोवैज्ञानिक रूपमा सजग गराउन सेनाले गस्ती गरेको हो,’ पोखरेलले भने ।

खलंगा बजारमा करिब सय जनामा कोरोना संक्रमण छ । जिल्लामा अढाइ सय संख्यामा कोरोना संक्रमित छन् ।