(काठमाडौँ)‘५ हजार भोट बदर नभएको भए त म सोझै आउने थिएँ । खासमा त्यो चुनाव मैले हारेको हैन ।’ फागुन १४ गतेको निर्णय कार्यान्वयन गर्ने बताएसँगै केही दिनमा वामदेव गौतमले राष्ट्रिय सभाको यात्रा गर्ने निश्चित भएको छ ।२०७४ मंसिरको चुनावमा बर्दिया–१ बाट पराजित भएयता प्रतिनिधिसभा सदस्य बन्न बारम्बार प्रयास गरेका नेकपा उपाध्यक्ष वामदेव गौतम ३३ महिनापछि मनोनीत कोटामा सांसद बनेर संघीय संसद् छिर्ने भएका छन् ।निर्वाचन हारे पनि सांसद र मन्त्री बन्ने नेपाली राजनीतिभित्र वर्षौंदेखि हुर्किइरहेको विकृतिको शृंखलामा फेरि नयाँ अध्याय थपिन लागेको हो ।

मैले बर्दियामा ४४ हजार ६९ मत प्राप्त गरेँ तर मेरो नाममा परेको ५ हजार भोट बदर भयो । बदर नभएको भए त म सोझै आउने थिएँ । खासमा त्यो चुनाव मैले हारेको हैन । तर जुन प्रणाली अवलम्बन गरेका छौं, त्यसले गर्दा हारेको देखियो । हाम्रा मतदातालाई स्पष्ट पारेको भए ४९ हजार भोट ल्याएर मैले त्यतिखेरै जित्ने स्थिति हो । त्यहाँ हाम्रो कमजोरी भयो । विद्युतीय प्रणाली भएको भए म उतिखेरै प्रतिनिधिसभामा आइसक्थेँ । त्यसकारण परिबन्धले भनौं या प्राविधिक त्रुटिले म हारेको देखियो । अब हराउन जोसुकै लागे पनि हारेको हैन भन्ने मैले महसुस गरेको छु ।