काठमाण्डौ २४ साउन  ।   कैलाली प्रहरीले नक्कली नोट छाप्ने मेसिन सहित ४ जना लाई प्रक्राउ गरी सार्वजनिक गरेको छ ।धनगढी रहेर नक्कली नोट छाप्ने मेसिनसहित पक्राउ परेका चारजनालाई आज विहान पत्रकार सम्मेलन गरी सार्वजनिक गरिएको हो । जिल्ला प्रहरी कार्यालय कैलालीले धनगढी उपमहानगरपालिका वडा नम्बर १ नैनादेवी मन्दिरनजिकै डढे महिना देखि उनीहरु नेपाली नक्कली नोट छाप्न कार्यमा संलगन हुदै आएको जनाएको छ ।

जिल्ला प्रहरी कार्यालय कैलालीका प्रहरी प्रवक्ता दक्ष कुमार वस्नेतले पक्राउ पर्नेमा कैलालीको चुरे गाउँपालिका वडा नम्बर १ का २५ वर्षीय खग्रेन्द्र बम भन्ने खग्रेन्द्र रजवार, चुरे गाउँपालिका वडा नम्बर १ कै २२ वर्षीय भोजबहादुर बम, धनगढी उपमहानगरपालिका वडा नम्बर ३ का २४ वर्षीय पल्लपराज भट्ट र महोत्तरी जिल्लाको बर्दिवास नगरपालिका ६ का २५ वर्षीय गोकुल खड्का प्रक्राउ परेको जानकारी दिए ।जिल्ला प्रहरी कार्यालय कैलालीले ४ जनालाई फरक फरक मितिमा पक्राउ परेका हो । गोकुल खड्कालाई सिआईवीको टोलीको सहयोगमा काठमाडौंबाट पक्राउ गरिएको हो भने अन्य ३ जना धनगढीमा नै पक्राउ परेको प्रहरी नायव उपरीक्षक दक्ष कुमार बस्नेतले बताए ।

उनीहरुको साथबाट खोटा नोट छाप्ने एक थान मेसिन, नोट छाप्न प्रयोग भएको दुई सय २० थान सेतो पेपरलगायतका नेपाली र भारतीय नक्कली नोट समेत बरामद गरिएको उनले बताए ।पछिल्लो दुई महिनामा धनगढीमा तीनपटक नक्कली नोट फेला परेपछि प्रहरीले अनुसन्धान अगाडि बढाएको थियो । नक्कली नोट कारोबारीले पहाडी दुर्गम र भीडभाड हुने ठाउँमा नक्कली नोट प्रयोग गर्दै आएको प्रहरीको भनाई छ ।यसअघि पनि प्रहरीले कैलालीको कैलारी गाउँपालिका वडा ५ का ३४ वर्षीय छेदुराम डगौरा चौधरीलाई र भारतीय नागरिक श्रवणकुमार सिंह र गरुजित सिंहलाई नक्कली नोटसहित पक्राउ गरेको थियो ।कैलालीमा एकपछि अर्को गर्दै नक्कली नोट फेला पर्न थालेपछि वित्तीय कारोबार हुने संस्था, पसल, अस्पतालमा चुनौती थपिनुका साथै प्रहरीलाई समेत चूनौति थपिएको छ।