भोटेकोशी बाढीले सडक सञ्जाल अवरुद्ध बनाएपछि रसुवाको स्याफ्रुबेँसीबाट गोसाइँकुण्ड गाउँपालिकाका विभिन्न वडालाई जोड्ने अस्थायी काठेपुल सञ्चालनमा आएको छ।

स्थानीयवासीको आवतजावत सहज बनाउन वडा कार्यालय र स्थानीय युवाको पहलमा तीन दिन लगाएर निर्माण गरिएको पुल बिहीबारदेखि सञ्चालनमा आएको हो।

गोसाइँकुण्ड गाउँपालिका–३ का वडाध्यक्ष मिङमार छिरिङ तामाङका अनुसार पुल निर्माणमा वडा कार्यालय र स्थानीयवासीले संयुक्त रूपमा काम गरेका थिए। पुलका लागि आवश्यक काठ स्थानीयस्तरबाटै संकलन गरिएको थियो।

पुल सञ्चालनमा आएपछि गाउँपालिका–३ को खाम्जिङ, वडा नं. २ को टिमुरे र वडा नं. ४ को लाड्टाङ आवतजावत गर्ने स्थानीयवासीलाई सहज भएको छ।