कालिकोटमा करोडौँ मूल्यको सरकारी तथा नगर विकास समितिको जग्गा गैरकानुनी रूपमा व्यक्तिको नाममा दर्ता गरेको आरोपमा अख्तियार दुरुपयोग अनुसन्धान आयोगले १२ जनाविरुद्ध भ्रष्टाचार मुद्दा दायर गरेको छ।

अख्तियारले तत्कालीन भूमि सम्बन्धी समस्या समाधान आयोग जिल्ला समितिका अध्यक्ष धिरबहादुर बमसहित सरकारी कर्मचारी, जनप्रतिनिधि तथा जग्गा प्राप्त गर्ने व्यक्तिविरुद्ध बुधबार विशेष अदालत काठमाडौंमा आरोपपत्र दायर गरेको हो।

खाँडाचक्र नगरपालिका–१ स्थित सरकारी तथा नगर विकास समितिको जग्गा मिलेमतोमा व्यक्तिका नाममा दर्ता गराई सरकारलाई हानिनोक्सानी पुर्‍याएको अख्तियारको आरोप छ।

आयोगका अनुसार कानुनी प्रक्रिया पूरा नगरी तोकिएको सीमाभन्दा बढी जग्गा व्यक्तिका नाममा दर्ता गरिएको र केहीले पुर्जा पाएपछि छोटो समयमै जग्गा बिक्रीसमेत गरेका थिए। अख्तियारले प्रतिवादीहरूविरुद्ध बिगो, कैद, जरिवाना तथा जग्गा फिर्ताको मागदाबी गरेको छ।