नेपाली कांग्रेसले पार्टीको निर्वाचनसम्बन्धी निर्देशिका जारी गर्दै विभिन्न पदका उम्मेदवारको उम्मेदवारी शुल्क तथा प्रस्तावक र समर्थकको संख्या तोकेको छ।

निर्देशिकाअनुसार सभापति पदका लागि उम्मेदवारी दर्ता गर्दा ४० हजार रुपैयाँ शुल्क बुझाउनुपर्नेछ। सभापतिका उम्मेदवारका लागि १० जना प्रस्तावक र १० जना समर्थक आवश्यक पर्ने व्यवस्था गरिएको छ।

त्यस्तै, उपसभापति र महामन्त्री पदका उम्मेदवारले ३० हजार रुपैयाँ उम्मेदवारी शुल्क तिर्नुपर्नेछ। यी दुवै पदका लागि सात जना प्रस्तावक र सात जना समर्थक आवश्यक पर्नेछ।

कांग्रेसले सहमहामन्त्रीका लागि २० हजार र केन्द्रीय सदस्यका लागि १० हजार रुपैयाँ उम्मेदवारी शुल्क तोकेको छ। निर्वाचनसम्बन्धी निर्देशिकामार्फत उम्मेदवारी शुल्कसहित प्रस्तावक र समर्थकसम्बन्धी व्यवस्था स्पष्ट गरिएको कांग्रेस उपसभापति पुष्पा भुसालले बताइन्।