झापामा भदौ महिनामा २५ वटा विपद्का घटना हुँदा १९ लाख ४५ हजार रुपैयाँ बराबरको भौतिक क्षति भएको छ।

जिल्ला प्रहरी कार्यालय झापाका सूचना अधिकारी रञ्जन अवाका अनुसार विपद्का घटनामा मानवीय क्षति नभए पनि एक जना घाइते भएका छन्। घटनाबाट प्रभावित ६९ जनालाई प्रहरीले सकुशल उद्धार गरेको छ।

भदौमा बाढी र पहिरोका घटना नभए पनि जङ्गली जनावरको आक्रमण प्रमुख विपद्का रूपमा देखिएको छ। कूल २५ घटनामध्ये १७ वटा जङ्गली जनावरको आक्रमणका रहेका छन्। उक्त घटनामा एक जना घाइते भएका छन् भने ५५ जनाको उद्धार गरिएको छ। जनावरको आक्रमणबाट ६ लाख ३५ हजार रुपैयाँ बराबरको क्षति भएको प्रहरीले जनाएको छ।

यस्तै, जिल्लाका विभिन्न स्थानमा भएका सात वटा आगलागीका घटनाबाट १२ लाख १० हजार रुपैयाँ बराबरको क्षति भएको छ। चट्याङबाट एक लाख रुपैयाँ बराबरको क्षति भएको प्रहरीको तथ्याङ्क छ।

प्रहरी नायब उपरीक्षक अवाले विपद्का समयमा तत्काल उद्धार तथा राहतका लागि प्रहरी टोलीलाई चौबीसै घण्टा उच्च सतर्क अवस्थामा राखिएको बताए।