नेपाली कम्युनिस्ट पार्टी (नेकपा) ले आगामी मंसिरमा गर्ने भनिएको एकता राष्ट्रिय महाधिवेशनको कार्यतालिका प्रभावित भएपछि नयाँ कार्यतालिका ल्याउने तयारी गरेको छ।

मंसिर ११ देखि १५ गतेसम्म काठमाडौंमा गर्ने भनिएको महाधिवेशनका लागि यसअघि वडा, पालिका र प्रदेश अधिवेशन सम्पन्न गर्ने समयसीमा तोकिएको थियो। गत वैशाखको बैठकले भदौ १५ सम्म वडा, भदौ मसान्तसम्म पालिका र कात्तिक १५ सम्म प्रदेश अधिवेशन सम्पन्न गरी मंसिर ११ गतेदेखि एकता राष्ट्रिय महाधिवेशन गर्ने निर्णय गरेको थियो।

तर बाढीपहिरोलगायत प्राकृतिक विपद् तथा अन्य विविध कारणले पूर्वनिर्धारित कार्यतालिका प्रभावित भएको नेकपाले जनाएको छ। मंगलबार बसेको केन्द्रीय कार्यसंयोजन समितिको बैठकमा नयाँ कार्यतालिका ल्याउने विषयमा छलफल भएको प्रवक्ता प्रकाश ज्वालाले जानकारी दिए।

उनका अनुसार नयाँ कार्यतालिका दसैंअघि बस्ने केन्द्रीय सचिवालय बैठकमा प्रस्ताव गरिनेछ।

यसैबीच नेकपाले वामपन्थी दलहरूसँग पार्टी एकताको प्रक्रिया अघि बढाउन वार्ता समिति गठन गरेको छ। देव गुरुङको संयोजकत्वमा प्रकाश ज्वाला र गंगानारायण श्रेष्ठ सदस्य रहेको समिति गठन गरिएको हो।

समितिले विभिन्न कम्युनिस्ट तथा वामपन्थी दलसँग वार्ता अघि बढाउने र सहमति भएका दलसँग पार्टी एकताको प्रक्रिया अगाडि बढाउने प्रवक्ता ज्वालाले बताए। एमालेसहित अन्य दलसँग पनि छलफल र वार्ता गरिने उनले जानकारी दिए।