त्रिपुरेश्वरस्थित राहदानी विभाग अगाडि आत्मदाह गरेका मुगुका युवा गणेश नेपालीको शव वीर अस्पतालबाट निकालेर टिचिङमा स्थानान्तरण गरिएको छ। परिवारले अझै शव बुझेका छैनन्।

परिवारका सदस्य र सरकारबीच राति भएको वार्ता सहमतिमा पुग्न नसकेपछि शवलाई टिचिङ सारिएको हो । राति १० बजे गणेशको शव टिचिङ लगिए पनि परिवार भने वीरमै छन् । गणेशका बुबाआमा रातभर वीरको जलन वार्डमै बसेको मुगुका आशिष देवकोटाले जानकारी दिए ।

मृतकका दाजु मदन नेपालीले सरकारी पक्षसँग छलफल गरेका थिए । परिवारको शिक्षा, स्वास्थ्य, भरणपोषणको ग्यारेन्टी र आवश्यक क्षतिपूर्तिको माग सरकार समक्ष राखिएको छ । छलफलको सहजिकरण गृहमन्त्री सुधन गुरूङनिकट मुगुका युवा अनिल बस्नेतले गरेका थिए । सरकारका तर्फबाट प्रधानमन्त्रीकी प्रेस विज्ञ दीपा दाहाल पनि सहभागी भएकी थिइन् । परिवारको सबै माग पुरा गर्न सरकार पक्षले असमर्थता जनाएपछि सहमति हुन नसकेको देवकोटाले नेपाल प्रेसलाई बताए ।

‘सरकार पक्षबाट जसरी पनि लाश बुझ्न दवाव दिइयो । अनाधिकृत व्यक्तिहरू सरकार पक्षबाट वार्तामा संलग्न छन् । हामीलाई वार्तामा बस्न दिइएन,’ उनले भने ।

राति १० बजे प्रधानमन्त्रीकी प्रेस विज्ञ दाहालको उपस्थिति र काठमाडौँका सिडिओको रोहवरमा शव टिचिङ अस्पतालमा लगिएको हो । त्यसक्रममा बाक्लो संख्यामा सुरक्षाकर्मी परिचालन गरिएको थियो । जबरजस्ती शव उठाइएको भनेर अस्पताल परिसरमा मृतक पक्षले विरोध जनाएका थिए ।