इरानको दक्षिणपश्चिमी खुजेस्तान प्रान्तमा आइतबार ५ म्याग्निच्युडको भूकम्प गएको छ। भूकम्पपछि ४ म्याग्निच्युडको परकम्पसमेत महसुस गरिएको छ।

तेहरान विश्वविद्यालयको भूकम्प विज्ञान केन्द्रका अनुसार सलन्द क्षेत्रमा गएको मुख्य भूकम्प १२ किलोमिटर गहिराइमा केन्द्रित थियो भने परकम्प ८ किलोमिटर गहिराइमा रेकर्ड गरिएको थियो।

इरानको सरकारी समाचार एजेन्सी आईआरएनएले पनि भूकम्प विज्ञान केन्द्रलाई उद्धृत गर्दै घटनाको पुष्टि गरेको छ। हालसम्म भूकम्पका कारण ठूलो क्षति वा मानवीय हताहती भएको आधिकारिक विवरण सार्वजनिक भएको छैन।

इरान भूकम्पीय जोखिमका हिसाबले संवेदनशील मुलुकमध्ये एक हो। देशको करिब ९० प्रतिशत भूभाग भूकम्पीय जोखिम क्षेत्रमा पर्ने बताइन्छ। सक्रिय भ्रंशरेखा नजिक रहेका सहरहरू र पुराना तथा कमजोर संरचनाका कारण सामान्य भूकम्पले पनि ठूलो क्षति पुर्‍याउने जोखिम रहने गर्छ।

सन् २००३ मा इरानको बाम क्षेत्रमा गएको ६.६ म्याग्निच्युडको विनाशकारी भूकम्पमा २६ हजारभन्दा बढी मानिसको मृत्यु भएको थियो।