ललितपुरको ग्वार्कोमा एक जनालाई कुटपिट गरी हत्या गरेर फरार रहेका दुई अभियुक्तलाई प्रहरीले पक्राउ गरेको छ। 

ललितपुर महानगरपालिका वडा नं. १७ ग्वार्कोस्थित एउटा ग्यारेजमा चोरी गर्न आएको भन्दै ललितपुर महालक्ष्मी नगरपालिका वडा नं. ४ का अशोक कार्की भन्ने अशोक सुबेदीमाथि निर्घात कुटपिट भएको थियो। 

गत असार २४ गते राति ८ बजे भएको उक्त घटनामा कुटपिटबाट अचेत भएका सुबेदीलाई उपचारका लागि तत्काल किष्ट अस्पताल पुर्‍याइएको थियो। उपचारकै क्रममा उनको मृत्यु भएपछि प्रहरीले कर्तव्य ज्यान मुद्दामा अनुसन्धान अघि बढाएको थियो।

वारदात पश्चात फरार रहेका अभियुक्तहरूलाई जिल्ला प्रहरी परिसर ललितपुर, मातहतको प्रहरी वृत्त सातदोबाटो र प्रहरी प्रभाग इमाडोलबाट खटिएको संयुक्त प्रहरी टोलीले विभिन्न स्थानबाट पक्राउ गरेको हो।

पक्राउ पर्नेहरूमा रामेछाप लिखु तामाकोशी गाउँपालिका वडा नं. ६ घर भई हाल ग्वार्को बस्ने २६ वर्षका गणेश मगर र ललितपुर गोदावरी नगरपालिका वडा नं. १० चापागाउँ बस्ने २६ वर्षका मनोज दहाल रहेका छन्। 

पक्राउ परेका दुवै जनालाई प्रहरी वृत्त सातदोबाटोमा ल्याएर कर्तव्य ज्यान मुद्दामा ५ दिनको म्याद थप गरी आवश्यक अनुसन्धान भइरहेको छ।