लेदोसहितको पहिरोले कालीगण्डकी कोरिडोर अवरुद्ध, बागलुङको दक्षिण क्षेत्रको यातायात ठप्प
बागलुङ — राष्ट्रिय गौरवको आयोजना कालीगण्डकी कोरिडोरअन्तर्गत बागलुङ खण्डको जैमिनी नगरपालिका–८ बेलबगरमा लेदोसहितको पहिरो खस्दा सडक अवरुद्ध भएको छ।
आज बिहान खसेको पहिरोले सडकमा क्षति पुर्याएपछि त्यस क्षेत्रमा यातायात सञ्चालन पूर्ण रूपमा रोकिएको जिल्ला प्रहरी कार्यालय बागलुङले जनाएको छ।
जिल्ला प्रहरी कार्यालयका प्रहरी नायब उपरीक्षक रामेश्वर त्वातीका अनुसार पहिरोले अवरुद्ध सडक खुलाउने प्रयास भइरहेको छ। तर, निरन्तर लेदो बगिरहेकाले सडक मर्मत तथा खुलाउन समस्या भइरहेको उनले बताए।
पहिरोका कारण कालीगण्डकी कोरिडोरको उक्त खण्ड अवरुद्ध हुँदा बागलुङको दक्षिण क्षेत्रमा सञ्चालन हुने सवारीसाधन ठप्प भएका छन्। वैकल्पिक सडकको व्यवस्था नभएकाले सडक नखुल्दासम्म यात्रुहरू त्यहीँ रोकिनुपर्ने अवस्था सिर्जना भएको छ।
प्रहरीका अनुसार सडक खुलाउने कामका लागि आवश्यक पहल भइरहेको छ।
