ब्रसेल्स, असार १५ — युरोपेली सङ्घ (इयू) र चीनबीच बढ्दो व्यापारिक तनाव समाधान गर्ने उद्देश्यसहित उच्चस्तरीय वार्ता सोमबार ब्रसेल्समा सुरु हुने भएको छ।

चिनियाँ व्यापार प्रतिनिधि वाङ वेनताओ र युरोपेली सङ्घका व्यापार प्रमुख मारोस सेफकोभिकबीच हुने वार्तामा व्यापार असन्तुलन, भन्सार नीति र औद्योगिक प्रतिस्पर्धासम्बन्धी विषयमा विस्तृत छलफल हुने बताइएको छ।

सेफकोभिकका अनुसार दिनभर चल्ने वार्तामा दुवै पक्षले समस्या न्यूनिकरण र समाधानका उपाय खोज्ने प्रयास गर्नेछन्। वार्तापछि साँझ चिनियाँ प्रतिनिधिलाई औपचारिक रात्रिभोजमा स्वागत गर्ने कार्यक्रमसमेत तय गरिएको छ।

युरोपेली सङ्घले चीनसँगको बढ्दो व्यापार असन्तुलनलाई गम्भीर चुनौतीका रूपमा लिँदै आएको छ। सस्तो चिनियाँ उत्पादनको बढ्दो आयातले युरोपेली उद्योगहरू संकटमा पर्न सक्ने भन्दै ब्रसेल्सले चिन्ता व्यक्त गरेको छ।

आर्थिक तथ्यांकअनुसार सन् २०२५ मा युरोपेली सङ्घको चीनसँगको वस्तु व्यापार घाटा करिब ३६० अर्ब युरो पुगेको थियो। यसले युरोपेली बजारमा संरचनात्मक असन्तुलन बढाएको विश्लेषण गरिएको छ।

इयूले सरकारी अनुदानका कारण चिनियाँ कम्पनीहरूले अनुचित लाभ लिएको आरोप लगाउँदै आएको छ। त्यसका आधारमा स्टिल, साना पार्सल, र विद्युतीय सवारीसाधनमा भन्सार तथा सुरक्षा उपायहरू लागू गरिएका छन्।

यद्यपि, ब्रसेल्सले चीनसँग व्यापार युद्ध चाहँदैन भन्दै वार्ताबाट समाधान खोज्ने नीति अघि सारेको छ। चीनले पनि कुनै पनि व्यापारिक प्रतिबन्धको जवाफ दिने चेतावनी दिँदै आएको छ।

दुवै पक्षले आफूलाई “साझेदार” भन्दै सम्बन्ध बिग्रिन नदिनुपर्नेमा जोड दिइरहेका छन्। वार्तालाई युरोप–चीन आर्थिक सम्बन्धको भविष्यका लागि निर्णायक मानिएको छ।