शिक्षा, विज्ञान तथा प्रविधिमन्त्री सस्मित पोखरेलले माध्यमिक शिक्षा परीक्षा (एसईई) मा ननग्रेडेड (अनुत्तीर्ण) भएका विद्यार्थीका लागि तयारी कक्षा सञ्चालन गरिने बताएका छन् ।

मंगलबार सिंहदरबारमा बसेको प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिको बैठकमा मन्त्री पोखरेलले ननग्रेडेड विद्यार्थीलाई लक्षित गरी तयारी कक्षा वा विशेष कार्यक्रम ल्याउने विषयमा मन्त्रालय प्रतिबद्ध रहेको जानकारी दिएका हुन् ।

उनले शैक्षिक संस्थामा शैक्षिक वातावरण कायम गर्न शिक्षा क्षेत्रलाई राजनीतिमुक्त बनाउने प्रयास भइरहेको पनि स्पष्ट पारे।

तर, विद्यालयमा राजनीतिक गतिविधिमा पूर्ण प्रतिबन्ध लगाउने उद्देश्य नभएको उल्लेख गर्दै उनले राजनीतिक गतिविधि गर्न चाहनेले शैक्षिक वातावरणलाई असर नगर्ने गरी बाहिरबाट गर्नुपर्ने धारणा राखे ।

मन्त्री पोखरेलले विद्यार्थी सङ्ख्या न्यून भएका विद्यालयलाई मर्ज गर्नु अन्तिम विकल्प भएको भन्दै, विद्यार्थी सङ्ख्या बढाएर विद्यमान विद्यालयलाई नै सुदृढ बनाउने नीति लिइएको जानकारी दिए ।

बैठकमा समिति सदस्यहरूले सुकुम्वासी बस्तीबाट विस्थापित बालबालिकाको शिक्षाको निरन्तरताका लागि तत्काल विशेष व्यवस्था गर्न सरकारको ध्यानाकर्षण गराएका थिए ।