बेइजिङ । डोनाल्ड ट्रम्प ले चीन ले इरान माथि आफ्नो प्रभाव प्रयोग गर्दै क्षेत्रीय तनाव कम गर्न भूमिका खेल्न सक्ने बताएका छन् ।

बेइजिङ भ्रमणका क्रममा ट्रम्पले सी चिनफिङ पनि उक्त द्वन्द्व चाँडै अन्त्य भएको देख्न चाहेको बताएका छन् । तर हालसम्म कुनै ठोस सम्झौताको संकेत भने नदेखिएको उनको भनाइ छ ।

ट्रम्पका अनुसार इरानको तेल र ग्यासको ठूलो खरिदकर्ता भएकाले चीनले तेहरानमाथि दबाब सिर्जना गर्दै वार्तामा फर्काउन सहयोग गर्नुपर्ने आवश्यकता छ । अमेरिकी प्रशासनको प्रयास इरानलाई पुनः वार्ताको टेबलमा ल्याउने र क्षेत्रीय स्थिति सहज बनाउनेतर्फ केन्द्रित रहेको बताइएको छ ।

रिपोर्टअनुसार ट्रम्पले चीनलाई होर्मुज स्ट्रेट खुला राख्ने प्रयासमा सहभागी हुन आग्रह गरेका छन् । विश्वव्यापी तेल आपूर्तिका लागि यो समुद्री मार्ग अत्यन्त महत्वपूर्ण मानिन्छ ।

तर चीनको विदेश मन्त्रालय ले अमेरिकी धारणामाथि प्रश्न उठाउँदै यो द्वन्द्व सुरु नै हुनु नपर्ने प्रतिक्रिया दिएको छ । बेइजिङले सैन्य कारबाहीभन्दा संवादमार्फत समाधान खोज्नुपर्नेमा जोड दिएको छ ।

ट्रम्प : हाम्रो सोच मिल्दोजुल्दो छ

ट्रम्पले इरान मुद्दामा आफ्नो र सी चिनफिङको सोच धेरै हदसम्म मिल्दोजुल्दो रहेको बताएका छन् । उनका अनुसार दुवै नेता युद्ध अन्त्य गर्न तथा होर्मुज स्ट्रेट खुला राख्न चाहन्छन् ।

बेइजिङमा भएको भेटपछि ट्रम्पले भने, “हामी यो समाप्त भएको चाहन्छौं । हामी चाहँदैनौं कि इरानसँग परमाणु हतियार होस् ।”

होर्मुज स्ट्रेटबारे अमेरिकी धारणा

ट्रम्पले अमेरिकालाई प्रत्यक्ष रूपमा होर्मुज स्ट्रेट आवश्यक नभए पनि यसले विश्व ऊर्जा आपूर्तिमा ठूलो असर पार्ने भएकाले यसको स्थायित्व महत्वपूर्ण रहेको बताएका छन् । उनका अनुसार यसको सबैभन्दा बढी फाइदा चीन लगायत अन्य देशहरूलाई हुन्छ ।

अमेरिकाले क्षेत्रीय रूपमा इजरायल, साउदी अरेबिया, युनाइटेड अरब इमिरेट्स, कतार, कुवेत तथा बहराइन लगायत देशलाई सहयोग गरिरहेको जनाएको छ ।

यसैबीच मार्को रुबियो ले पनि इरानले होर्मुज स्ट्रेटलाई अमेरिकाविरुद्ध दबाबको माध्यम बनाउन नपाउने बताएका छन् ।