म्याग्दी, वैशाख १४ (बुधबार) — मुस्ताङ हुँदै चीनको कोरला नाका जोड्ने बेनी–जोमसोम–कोरला सडकअन्तर्गत म्याग्दी खण्ड आज बिहानैदेखि अवरुद्ध भएको छ।

रघुगङ्गा गाउँपालिका–२ स्थित माथिल्लो बैसरी (सिरुवारी) क्षेत्रमा पहिरो खस्दा ७६ किलोमिटर लामो बेनी–जोमसोम सडकमा सिधा यातायात सम्पर्क विच्छेद भएको हो।

जिल्ला प्रहरी कार्यालयका अनुसार सडक विभाग र बेनी–जोमसोम–कोरला सडक आयोजनासँगको समन्वयमा पहिरो पन्छाउन उपकरण परिचालन गरिएको छ। तर निरन्तर वर्षाका कारण काममा कठिनाइ भइरहेको जनाइएको छ।

सडक अवरुद्ध हुँदा बेनीदेखि मुस्ताङतर्फ र जोमसोमबाट बेनीतर्फ गइरहेका सवारीसाधन बीच बाटोमै रोकिएका छन्। यसले स्थानीयवासीसँगै मुक्तिनाथ दर्शन तथा मुस्ताङ भ्रमणमा निस्किएका पर्यटक र तीर्थयात्रीहरू प्रभावित भएका छन्।

सिरुवारी क्षेत्रमा वर्षा हुँदा बारम्बार पहिरो खस्ने समस्या दोहोरिँदै आएको छ, जसले बेनी–जोमसोम सडकमा नियमित यातायात सञ्चालनलाई चुनौतीपूर्ण बनाउँदै आएको छ।