काठमाडौँ — श्रम संस्कृति पार्टी ले मातहतका सबै कमिटीका कार्यक्रमहरूमा अध्यक्ष हर्क साम्पाङ को तस्वीर अनिवार्य रूपमा प्रयोग गर्न निर्देशन दिएको छ।

पार्टीको १ नम्बर (कोशी) प्रदेश कार्यसमितिले जारी गरेको पत्रमा जिल्ला, महानगर, उपमहानगर, पालिका, वडा तथा टोलस्तरका कार्यक्रममा प्रयोग हुने ब्यानर र प्रचार सामग्रीमा “श्रद्धेय श्रम पिता अध्यक्ष हर्क साम्पाङ” को तस्वीर राख्न भनिएको हो।

प्रदेश अध्यक्ष प्रताप राई र सचिव दीपक तिमिल्सिनाको हस्ताक्षर रहेको वक्तव्यमा पार्टी प्रचार सामग्रीमा अध्यक्ष साम्पाङलाई केन्द्रमा राख्न निर्देशन दिइएको उल्लेख छ।

यो निर्णयलाई विगतमा नेकपा एमाले ले अध्यक्ष केपी शर्मा ओली को तस्वीर अनिवार्य प्रयोग गर्ने नीति अपनाएको शैलीसँग तुलना गरिएको छ।

एमालेले २०८० साउन २९ गतेको सचिवालय बैठकमार्फत सार्वजनिक कार्यक्रममा अध्यक्ष ओलीबाहेक अन्य नेताको तस्वीर प्रयोग नगर्ने निर्णय गरेको थियो।