सल्यान माओवादीद्वारा मतदातालाई धन्यवाद: 'यो मत दबाब र प्रलोभनको होइन, विचार र निष्ठाको हो'
सल्यान । नेपाल कम्युनिष्ट पार्टी (माओवादी) जिल्ला समिति सल्यानले प्रतिनिधि सभा निर्वाचन २०८२ मा पार्टी र उम्मेदवारप्रति विश्वास व्यक्त गर्ने सम्पूर्ण मतदाताहरूलाई हार्दिक धन्यवाद ज्ञापन गरेको छ।
जिल्ला इन्चार्ज अनिल सी र सेक्रेटरी भिमसेन सीद्वारा हस्ताक्षरित संयुक्त प्रेस विज्ञप्ति जारी गर्दै पार्टीले एकीकृत जनक्रान्तिको कार्यदिशामा गोलबन्द हुने जनसमुदायको उच्च सम्मान गरेको हो। विज्ञप्तिमा राष्ट्रिय स्वाधीनता, जनअधिकार र जनजीविकाको संघर्षलाई निर्वाचनमार्फत थप उचाइमा पुर्याइएको उल्लेख गरिएको छ।
पार्टीले केन्द्रको निर्णय अनुसार सल्यानको एकमात्र निर्वाचन क्षेत्रमा भाग लिएको स्मरण गराउँदै एकदमै छोटो समयको तयारीका बाबजुद पनि मतदाताले देखाएको उत्साहजनक सद्भाव र विश्वासको उच्च मूल्यांकन गरेको छ। "पार्टी र उम्मेदवारले प्राप्त गरेको अमूल्य मत कुनै दबाब, प्रलोभन वा किनबेचको परिणाम नभई विचार, निष्ठा र देशभक्तिप्रतिको प्रतिबद्धता हो," विज्ञप्तिमा भनिएको छ।
निर्वाचन अवधिभर सक्रिय भूमिका खेल्ने पार्टीका केन्द्रीय सदस्य, प्रदेश इन्चार्ज, प्रतिनिधि समिति सदस्य, जिल्ला कमिटीका सदस्य, स्थानीय तहका कार्यकर्ता, सहयोगी दाता र शुभचिन्तकहरूलाई समेत नेतृत्वले धन्यवाद दिएको छ। सल्यानी जनसमुदायको यो साथले आगामी दिनमा श्रम संस्कृति स्थापना र क्रान्तिको यात्रामा थप उर्जा मिलेको विज्ञप्तिमा उल्लेख छ।
यसैगरी, सोही निर्वाचन क्षेत्रबाट प्रत्यक्षतर्फ विजयी उम्मेदवार रमेश कुमार मल्ललाई नेकपा (माओवादी) सल्यानले हार्दिक बधाई ज्ञापन गर्दै सफल कार्यकालको शुभकामना व्यक्त गरेको छ। आगामी दिनमा जनसरोकारका मुद्दा र जिल्लाको विकासमा विजयी उम्मेदवारको सकारात्मक भूमिका रहने अपेक्षा समेत गरिएको छ।
